Williamnagar, June 26, 2026: Garo Students’ Union (GSU), Eastern Zone, Williamnagar, re·anggipa bilsini July 18 tariko Williamnagar Samgong-o me∙chik chadambe saksako so∙otgipani bidingo duk man·enggipa nokdangni manderangna kakket bichalko on·na ja·man chakengahani gimin, suk ong·gijaniko parakataha.

A·sel ong·aoni da·o bilsisa ong·na am·pilahaoba, dos dakgipa mandeko rim·na man·kujaengani gimin aro Magisterial Inquiry-ko matchotmanpiloba, Report-ko on·na man·kujaenga, ine parakatenba, inquiry ka·anio mai result-ko man·ahachim aro mai ja·kuko de·ahachim, da·alonaba, maming result-ko niksona man·kujaengani gimin, ia mamlako sandianio pangchake daitoko ra·enggipa Officer-rangni kosako mai ja·kuko de·aha ma·sina man·kujaenga, ine GSU parakataha.

Sianggipa me·chikni nokdangna da·alonaba maming compensation ba dakchakaniko aro kakket bichalko on·na man·kujaenga ineba parakataha.

Dos dakgipa mandeko bilsisa gapangpiloba, rim·na man·kugijani a·selara, sason ka·ani ba bichal ka·anio bilgrianiko mesokani ong·a. Indake ong·genchimode, manderangna ma·sisretani aro ka·dongna man·gijani ong·a aro dos dakgipa mandena jokani cholko on·ani ong·enga. Dos dakani ja·mano kate dongna man·ode, ian kakket bichalko bilgritani ong·a aro dos dakgipa mandena dakchakani ong·a, ine janapatenba, department-o ka·dongna man·gijaniko GSU parakataha.

Uni gimin, mande ra·ako man·na kragipa a·dokni Skotong Minister Conrak K Sangma-na aro gipin nangchapgipa department-rangna, East Garo Hills a·jani
DC-ni jak gita chitti sedoate, ia mamlani bidingo Special Investigation Team (SIT)-chi gital dake sandiataniko dakchina GSU Eastern Zone dabiangaha.

Dos dakgipa mandeko ta·rake rim·china aro Magisterial Inquiry Report-o pangchake, niam gita ja·ku de·china dabiangenba, duko ga·akenggipa nokdangna ta·rake dakchakaniko on·china aro kakket bichalko ra·bachina GSU Eastern Zone dabiangaha.

Ia dabianiko ta·rake chu·sokatjaode, GSU, Eastern Zone, rakbata ja·kuko de·anggen ineba parakataha.