Tura, August 4, 2026: West Garo Hills a·jani Dalu Sub-Division-ni ning·o donggipa Kherapara-oni Diganggre-ona dakanggipa PMGSY rama ko tarienggipa Company M/S JC Infra Corporation Ltd -ni kosako Sairill D Marak August 2 tariko Asugre Pulis Out Post-o badi ka·doangaha.

Sairill Marak-ni u·iatani gitade, Anigre songo nala tarigipa an·chengni pal a·mangko cement baksa brine tariengani gimin, indake sorkarini on·atgipa tangka paisarangko ong·gija dake cha·boke kamko ka·enga ine Marak-ni badi seatgipa chittio janapataha.

Indake manderangni namgnina aro re·a doani rama jal·langko namdapatna, sorkarini on·atgipa tangkarangko name kam ka·na nangachim. Indiba ong·gija dake kam ka·anichi A·chik a·songni development-ko nosto ka·enga ine janapatenba, ian manderangni salantio re·rurana nangchongmotgipa rama ong·achim, ine Marak parakataha.

Ia ramako ong·gija dake kamrangko ka·na nangja aro jolni manderangna on·atgipa sorkarini fund-rangko kal·ake bon·atna nangja ine Marak matnangataha.

JC Infra Corporation Ltd -ni rama tarianirang manderangna maming naljokani dongja aro kamrang namsrangja ineba Sairill Marak jegalataha.