Tura, August 5, 2026: Garo Hills Autonomous District Council (GHADC)-ni election-o rorirangko susana ba chakatna on·jachina dabie, Scheduled Tribe (ST) Certificate-ko mandatory dakchina, Garo Hills-ni dingtang dingtang Civil Society Organisation (CSO)-rang, Nokma Sanirang aro A·chik a·songni manderang re·anggipa, March jao jegalsoaniko dakengon, Esmatur Mominin manigija, GHADC-o election-o susana gita Nomination File ka·drana re·bahani a·sel, Garo Hills-o so·sojengjeng ong·angaha.

Indake, Garo Hills-o so·sojengjeng ong·ani bidingo ACHIK Organisation-ni dilgipa Jhony Marak aro gipin NGO-ni dilgiparangko pulisrang rim·e, Jowai pattoko donataha. Jhony Marak Jowai pattoko sal 143 dongani ja·man, da·al August 5 tariko Jowai pattokoni jokaha.

GHADC election-o susana nomination file ka·drana re·bae, Garo Hills-o so·sojengjeng ong·atgipa, Esmatur Mominin aro Social Mediao ding·chaoatgipa, Sofior Rahman-kode jasa ong·gijan, Nongpoh pattokoniko wataha. Indiba NGO dilgiparangkode, jabri batpile pattoko donani ja·mansa wataha. Indiba mitam NGO dilgiparang da·onaba pattokoni jokkuja. Indakgipa obostarang Meghalaya a·doko ong·enga, ine nikna gita man·enga.

Jhony Marak sal 143 Jowai jailo duk chakani ja·man, uni ong·katbaako nichaksona gita, nokdangni manderang baksa GSMC-ni Acting Chairman Balkarin Ch. Marak aro ACHIK Organisation-ni dilgiparang, Jowai pattok nokoni ong·katram gate mikkangona re·ange, uko mande ra·bee rimchaksoaha.