Tura, June 16, 2026: GHADC-ni election-ko ja-6 ra·doani ja·pangara SER aro GSL-ko be·en pil·atna ku·wataniko A·chik jat gimik knaaha. Da·alo gitcham, MDC-rang, EC-ko songtaiani somoio, dingtangmancha GSL aro SER-ko tarina ja 6 somoi on·bo inesa bi·aha. Indide ia jadoni gisepo maiko dakskaenga?..da·o badita somoi re·angjok aro badita ja dongkuenga, na·simangni ku·rachakako jadokni gisepo chu·sokatna man·genma, ine 4-Rongrikkimgre-o susaenggipa Independent candidate Clinton R.Marak sing·doataha.

Uni gisepon da·alonaba, SER aro GSL-ni gimin maming update-kon niksona gita man·kuja. Indiba songbad-rango Committee songaha aro Committee-ni report-ko sengenga ine agananikosa niksona gita man·enga, indake agananiara chong·motkon aganengama, ma an·tangtangni ja 6-na somoi ra·doaniko chu·sokatnasa kattarangko taridape aganengama, ineba Marak sing·doangkuaha.

A·chik jat da·alo namen jajaaniko man·engaha. Uamangni dingtang dingtang, GHADC fund-rangko oke jakkalaniara, bilongen kragiani ong·jaha, maina uamangni term, re·anggipa April 18 tarikon matchotaha. Indake ong·engon, ja 6-na somoko ra·dape, EC-ko rikanio GHADC-ni fund-rangko skatang oke jakkalanide kraani ong·jaha, maina uamangni term bon·aha, indiba Garo Hills-o so·sojengjeng kajia ong·ani a·selsa, ja 6 somoiko ra·dona ga·akaha.

Da·ode, uamangni ku·rachakgimin kamrangko dongale, maiba man·gninasa ja 6-na EC-ko rikenga ine A·chik jatni gisiko chanchiani sokengaha.

Election-ko somoi gita ong·atgenchimode, da·alo, gital MDC-rangsa GHADC-o kamrangko ka·gnokchim aro pilak fund-rangko A·chik a·songni namgnina kraa bewalo kamrangko ka·genchim. Indiba uamangni iandake kam ka·aniara, A·chik a·songni manderangko, cha·bokani ong·a. Uamangko bilsi 5-nasan seoke watatachim, indiba mande ra·gija gita ga·aka aro gital MDC candidate-rang jekai INC, NPP, BJP, GNC, UDP, NCP aro Independent Candidate-rangni kamko ra·seke ka·a gitaba ong·a ine Marak parakataha

Uni gimin ku·rachakatangko somoi gita be·en pil·atna man·jawaha, ine nikgenchimode, election-ko ta·rake ong·atchina jat gimik ku·monge kamrangko ka·on, nambatgipa ong·gen ine Marak janpatenba, mikkangchi je political party baksa Independent-ba coalition ong·e, GHADC-o EC-ko rikchina, indiba India a·songni niamko mande ra·e kraa bewalo songsalna kamko ka·na election-ko somoi gita ong·atna man·ode, A·chik a·songna nambegipa ong·gen, ine Marak parakataha.

Batanggipa 2021 bilsioni 2026 bilsiona, MDC-ko seokaha, indiba da·o ja 6 ra·doani somoio badita tangka paisarangko MDC-rang an·tangtangni constituency-o jakkalahachim, uarangko constituency-tangni manderang, GHADC-o RTI ka·e report-ko ra·bo aro ground inspection-ko songona re·ange am·sandiode, A·chik a·songna MDC Scheme-rang, badita percent development-ko ka·aha, u·ina gita man·gen aro badita chu·sokjaha aro chu·sokja uko kachari-ona ra·angna gita man·gen, ine Marak A·chik a·songni manderangko didiataha.