Resubelpara, June 17, 2026: North Garo Hills, a·jao Traffic Pulis Department, dongjae bang·a neng·nikanirangko man·engani gimin, A·chik Conscious Holistically Integrated Krima (ACHIK) Organisation, Monggolbar salo North Garo Hills a·jani Additional Superintendent of Pulis (ASP) Ravi K Sangma-ko gronge, Traffic Pulis Unit-ko North Garo Hills-o donchina mol·molangaha.

North Garo Hills a·jao Dedicated Traffic Pulis Department-ko ra·gate kam ka∙china gita Proposal-koba on·angjolaha. North Garo Hills a·jao manderangni naljokanina aro ramarango skatang gari salgiparangko niroke kam ka·na man·na gita, ACHIK Organisation, Northern Zone, didiangaha.

“Chinga ACHIK Organisation Northern Zone, North Garo Hills, a·jao gari salgiparana namen jajrengani aro kenchakani ong∙enga. Uni gimin, North Garo Hills-o Traffic Pulis Unit-ko ra·gatna nangchongmota, ine dabiangenba, a·sel ong·anirang batroroenga.Ian manderangni aro district administration-ni kam ka·na nangchongmotgipa ong∙enga. North Garo Hills-o dedicated Traffic Pulis Department dongjani a·sel, Traffic Rules, Enforcement-ni mongsonggipa kam ong·enga. Law aro Order ba ge·etgimin niam, gita apsan kam ka·ani ba ja·rikna nangani ong·a” ine ACHIK Organisation Northern Zone-ni Co-Chairman Rorok R.Marak parakataha.

Resubelpara, Bajengdoba, Mendipathar aro Kharkutta-ni bijangchio highway sorokrango, Traffic Pulis Unit, dongna nangchongmota, ineba Marak parakataha.

Garirangko ta·rakprete salanichi dal·begipa a·selrang bang·en ong·enga aro manderangni janggi gimaenga. Jrimgipa bosturangko gate salgipa garirangni simsakgija salanichi ja·achi re·ruraenggipa manderangna kenbeani ong∙enga.

Skulni somoio aro bajar anti cha·ani salrango traffic jam ong∙enga. Uni gimin, bajar anti jolrango garirangko skatang parking ka·ani a·sel, manderang re·ruraanio namen neng∙nikaniko man∙enga. Unbaksana, emergency service-rang dongjani a·selba neng∙nikani ong∙enga, ine ACHIK Organisation parakataha.

Uni gimin, North Garo Hills-o Road Safety Awareness program-ko, ong·ate helmet-rangko jakkale, seat belt-rangko jakalanichi gari salgipa manderang naljokaniko man·gen, iarangni bidingo awareness campaign-ko ong·atna gita nangenga.

Ia obostarangni bidingo North Garo Hills-o pangkamgipa Traffic Pulis Unit-ko songchina, ACHIK Organisation, Northern Zone mol·molataha.