Tura, June 12, 2026:: Garo Hills Autonomous District Council (GHADC) eleksin-ko ta·rake ong·atchina dabie Garo Hills-ni Social Activist sakgni, chong·motan Nilbath Ch. Marak aro Flaming B. Marak, Meghalaya High Court-o Public Interest Litigation (PIL) ka·doangaha.

GHADC eleksin-ko re·anggipa April 10 tarikon ong·atna tik ka·ahachim, indiba eleksin-o Tribal ong·gijagipa candidate-rangni bak ra·aniko jegalanichi rang·gitik so·sojengjeng ong·ahani gimin, GHADC eleksin-ko sorkari dontongatna nangaha.

Indake so·sojengjeng ong·ani March 9 tariko ong·aha, indiba ja·mano obostarang nampilna a·bachengahani gimin, bang·a manderangan, GHADC eleksin-ko ta·raken ong·atchina nangniktokaha.

GHADC eleksin-ko ta·raken ong·atchina bang·bata manderang nangniktokgenchimoba, GHADC eleksin-o dingtang Electoral Roll-ko tarina man·na gita somoi ra·dapchina mitam manderang nangnikskaaha.

Iani bidingo Nilbath Marak aro Flaming Marak, re·anggipa May jao, High Court-o PIL ka·skaaha. PIL-ko ka·ani bidingo talataniko on·atengon, GHADC eleksin-o Scheduled Tribe (ST) candidate-rangsan susana man·aigen, ine a·dokni Governor raiko on·ahani gimin, GHADC eleksin-ko ong·atanio maming neng·nikani dongna nangjaha aro iani giminsa uamang eleksin-ko ta·raken ong·atna nangnike, High Court-o PIL ka·aha ine Nilbath Marak parakataha.

Uamangni PIL ka·ani bidingo Bristibar salo skanggipa hearing-ko ong·ataha aro ia hearing-ko ong·atanio, sorkarini Ukilrang, Affidavit-ko on·na gita somoiko bi·dapangaha. Iani bidingo Meghalaya High Court, anti gittam somoiko sorkarina on·aha aro changgipin hearing-ko re·baenggipa July 3 tariko ong·atna tik ka·angaha.