Shillong, June 12, 2026::Meghalaya Rajya Sabha eleksinko re·baenggipa June 18 tariko ong·atna tik ka·ahaoba, Bristibar salo, Nomination-rangko ra·pilani somoi attam 3 baji ong·ahaon, Meghalaya a·dokni ge·sa mangmang Rajya Sabha seat-na susagiparang dongjahani gimin, National People’s Party (NPP)-ni dilgipa James K Sangma-kon, a·dokni gital Rajya Sabha MP-na seokaha.

Bristibar attamni 3 baji ja·man, ua an·tangni nangchongmotgipa kamrangko matchotatna Meghalaya Legislative Assembly Secretariat-ona re·ange, Returning Officer-ko grongeon, eleksino seokani Certificate-ko ra·chakeaha.

Rajya Sabha-ni MP-na seokako man·ani ja·man, ua kobor ra·timgiparangna aganengon, Rajya Sabha-ni MP ong·aniara una dal·begipa daitoko jako ra·ani ong·enga aro ua an·tangko on·kangani gnang, ia kamko ka·gen ine Sangma parakataha.

“Rajya Sabha-ni gital MP-na seokako man·e, anga an·tangko rasongba chaebee nika, maina chubatgipa Parliament-o a·dokni member ong·aniara namen dal·begipa daitoko jako ra·ani ong·a. An·tangni daitoko anga talen ma·sia aro ia kamna an·tangko on·kange, kakketo chu·sokatna miksongenga,” ine Sangma aganaha.

Salgro salaram a·dokni member ong·e, Parliament-o bak ra·paanio ra·bianirangko janapatenba, salgro salaram a·dokrango member-rang komibatani gimin, jeko aganna gitaba somoiko bang·e man·rongja, indiba ua somoirangko on·dapchina didironggen ine a·dokni gital Rajya Sabha MP ku·rachakaha.

Rajya Sabha-ni saksa member ong·e, uni mongsonggipa daitorangara mai ong·gen ine sing·anina aganchakengon, Khasi aro Garo ku·sikrangko Constitution-ni Eighth Schedule-o napatani aro Inner Line Permit (ILP)-ko ra·gatchina dabianio ku·rang on·anian mongsonggipa ong·gen ine Sangma aganaha.

“Meghalaya a·doko an·ching Khasi aro Garo ku·sikrangko Eighth Schedule-o napatchina dabienga aro iasan ong·aigija, gipin dingtang dingtang nanganirangba dongkuenga. ILP-na dabianiko niatgenchimode, an·ching Meghalaya Legislative Assembly-oba iana resolution-ko ra·manaha. Uni gimin da·o anga saksa Rajya Sabha-ni member ong·e, iandakgipa a·dokni nanganirangna ku·rangko on·na nanggen,” ineba Sangma aganaha.

Parliament-ni saksa member ong·e ua, ma·mongni dingtang dingtang Scheme aro Program-rangko a·dokna man·bae on·na krenge kamko ka·gen, ineba NPP-ni dilgipa, ku·rachakaha.

Rajya Sabha seat-na uni susaaniko MDA-ni mitam member-rang namniktokjaha ine jegalatengon, “Iandake agananiara namen kakket ong·ja, maina angni Nomination file ka·aniko na·simangan nikaha aro ang baksa dongpagiparangara, NPP-ni MLA-rangsan ong·aija, indiba MDA-II sorkario bakrimenggipa gipin party-ni MLA-rangba dongpaha,” ine Sangma aganaha.