Williamnagar, May 9, 2026: Garo Students’ Union (GSU) Eastern Zone, May 8 tariko Rongrenggre Govt. Higher Secondary Skul, Williamnagar-o Williamnagar Citizen-rangni ong·atanggipa, Public Meeting-ona re·angjani bidingo talataniko on·ataha.

A·bachengo, meeting-ni organiser-rang chingko meeting-ona re·bae bak ra·pachina aganataha aro Williamnagar-ni manderang ong·pae, chingaba bakko ra·pagen ine chanchie donahachim. Indiba, meeting-ni miksongani aro maidake dakgen, maming chanchigrikani, talatgrikanirangko dakchengna okamade dongjaha, GSU-EZ-ni President Goera R.Sangma talataha.

Sangma-ni talatani gitade, Meeting-ni tarigimin, Program-ko bon·kamgipa somoiosa chingna on·ataha aro GSU-koba speech on·na program-o donataha. Program-ko seng·gnang maina on·jaha u·irikjaha. Ukode Organiser-rangsa ma·sia. Indake dakanichi GSU-ni gisepo jajaaniko ong·katataha, chong·motan, maibakai obostarang namgijani ong·genchimode, GSU-ni kosako pilak dosi ba matnanganirangko galna ba mikkango chadengatna ine miksongaosan okamengama ine chanchiani ong·aha.

GSU pangnan an·tangni dongimin niamrango pangchakesa kam ka·aniara, maming kattarangko sandie nikgija, ma·siani gri aro bebeko nisusaa donggija kamrangko ka·ja. Indiba, mitam ua Program Organiser-rangoni pangnan GSU-ko chone ra·na jotton ka·ronga aro bang·a somoion, an·tangtangni chanchie ra·bagimin kattarangko Public-ni namgnina GSU-ko ra·chakdraatronga. Indiba GSU uani gimin chanchirimna GSU office-ona okamode re·bana jechakrongskaa, ineba Sangma talataha.

Bang·a somoirangon, GSU dingtang dingtang nanganirangna meeting-rangko ong·ate, okamronga aro basakobade mitam organisation-rang sokbarongja. Indiba, GSU maming saloba organisation-ko uamangni sokbajani gimin sing·sandianiko dakrongja. Maina, darang organisation-rangan an·tangtangni niamo pangchakani aro kam ka·ani bewalrang donga aro uko mande ra·grikna nanga. Dolsa Organisation dolgipinko maiko dakna nanga aro nangja sing·dona aro ge·etna man·ja. GSU pangnan gipin organisation-rangni kam ka·ani bewalko mande ra·a aro apsan mande ra·anikon GSU-ba nangnika ine GSU dilgipa talataha.

Williamnagar Main Market-o ong·anggimin, obostani bidingoba dosiko GSU-ni kosako galna jotton ka·aniko GSU ma·siaha. GSU-ni dilgiparangko arrest ka·atna jotton ka·anirangba dongachim ine ma·siaha, indiba chinga pangnan pilakni namgnina aro tom·tom ong·aniko ra·bana jotton ka·enga.

Da·o arrest ka·gimin saksni manderangni bidingo GSU niamni gita kamrangko ka·engaha. Maina ia kattara Court aro judiciary-ni niamni ning·o dongahani gimin Court-ni a·palo dakgrikgija, niamni gita kam ka·na nanganirang donga, jekon chinga Niamko ma·sigiparang baksa agangrike ku·monggrike kam ka·na jotton ka·enga. Aro bang·gija salrangna skangsan SP, East Garo Hills, Williamnagar aro Advocate-rangko gronge agangrikanirangko dakangaha.

Hubnews-ni Reporter ba Editor-koba mol·molatna kusi ong·bea, “GSU meeting-ona maina sokbajaha?” ia sing·aniko Organiser-rango mangmang sing·aigija GSU-koba sing·chengode namachim. Samsani kattako ra·e talatani kattara namen mikkang niteani ong·a aro ma·sisretaniko ra·bana miksongani donga gita nika. Responsible media platform ong·e, dolgninan talatana cholko on·na nangchongmota, ineba Sangma talataha.

Bon·kame, indake aganna nangnika, mikkangchi GSU maming miksongani aro talatchengani gri kamrangko ka·jawa. Indiba, apsan miksongani aro kam ka·ani bewal-rangko nigrike kam ka·anirangko dakgen ineba parakataha.

Bebeko ma·sina jotton ka·tokpachina, pilak angni ka·sara A·chik jat sakantikon GSU President mol·molataha.