Gasuapara, May 01, 2026: South Garo Hills a·jani Gasuapara C&RD Block-ni ning·o ga·akgipa, Wagebokgre songoni bajarona re·gipa rama namsrangjani a·sel, JCB garirangkosa me·su samjakrangko salna gita jakkalenga, ine jolni manderang parakataha.

Manderangni parakatani gitade, Dagandagre songoni Rongchonggre songona kilometre 3 mangmangko rama tarina gita, saksa contractor Bimal Kumar Saha, contract ra·aha. Ia ramako tarina PWD department, Baghmara NH Division, RIDF Project-ni ning·o black topping anna gita, gong kror 3 lak 37 hajal 42 tangkarangko on·ahachim aro ia kamko ka·na 2024 bilsini August 28 tariko a·bachengaha aro ja 24-ni gisepon matchote on·china somoiko on·ahachim. indiba da·alona kingkingba matchote tarijaha. Unbaksana, contractor chu·onga gita vitamin aro ro·ongrangko on·jani a·sel ramarang da·on nosto ong·aha aro gari re·na namsranggija binektokaha.

Wagebokgre bajarko cha·na gita, Mitab aro Bangam jolona komibeoba song 30-na baten a·bri jolni manderang re·baenga. Indaken, jolni manderang namen neng·nikaniko man·enga. Indake ong·genchimoba, MDC aro MLA, Scheme-ni gitaba, manderangni namgnina maming dakchakaniko on·a dongja ine songni manderang suk ong·gijaniko parakataha.