Tura, May 01, 2026: Garo Hills-o mikka balwa rakgniko nie agansona man·na gita, Doppler Weather Radar (DWR)-ko songna Bristibar salo, Indian Meteorological Department (IMD), State Disaster Management Authority (SDMA) aro District Disaster Management Authority (DDMA)-ni official-rang aro Rongram C&RD Block-ni official-rang, Darechikgre aro Albella a·briona re·ange biaprangko niangaha.

Garo Hills-o skanggipa DWR-ko songanichi, mikka kimpretani, mikka jime wagni aro balwa rakgniko nie agansamsona gita cholko man·gnok.

Tura-o skanggipa ia DWR-ko Earth Sciences Ministry-ni ning·o India sorkarini a·bachengatgipa Mission Mausam-ni ning·o songna cholko nienga aro unbaksana Tura-o Meteorological Observatory-koba kulina IMD miksongenga ine Shillong-o donggipa Meteorological Centre-ni Director u·iataha.

Da·o dipet Meghalaya a·doko Sohra-osan DWR dongkuenga, una agre da·o Albella aro Chidekgre jolo DWR-ko songna miksongani chu·sokgenchimode, ian a·doko gnigipa DWR ong·gnok, ine parakataha.

Ia 2026 bilsini January 19 tariko, Assam a·dokni Jorhat-o a·bachengatgipa X-Band DWR-ko man·chape India a·song gimiko dam 48 Doppler Weather Radar-rangko chalaienga.

Garo Hills-o DWR-ko songna biap nianganio dongpagipa official-rangara, Regional Meteorological Centre, IMD Guwahati-ni Scientist ‘F’ Dr Sanjay O’Neill Shaw, Meteorological Centre, IMD Shillong-ni Director aro Head Thangjalal Lhouvum, Rongram C&RD Block-ni Nodal Officer Dr Jasmine SR Marak, SDMA-ni Field Engineer Jaspher Pdeng, Tura DDMA-ni Field Engineer Camelius K Sangma aro gipinrang dongpaha.