Williamnagar, July 3, 2026: Garo Students’ Union (GSU) Eastern Zone, Williamnagar, re·anggipa 2025 bilsini July 18 tariko Williamnagar Samgong-o me·chik chadambe saksako ka·saninggija den·e siatgipa mandeko da·onaba rim·na man·kujaengani gimin aro ua mamlani bidingo maming am·sandianiko dakgija donchipengani gimin, ta·rake am·sandiko dakenba, duko ga·akenggipa nokdangni manderangna kakket bichalko on·china dabie, Meghalaya State Commission for Protection of Child Rights (MSCPCR)-ni Chairman aro Tura-ni gitcham MP Agatha K. Sangma-ko mol·molangaha.

Ua misilbegipa a·sel ong·aoni da·o bilsisa ong·na am·pilengoba, duk man·enggipa nokdangni manderangna maming ka·dimeatani aro k·a·dongataniko on·na gita kamko ka·jaenga aro ua a·sel ong·ani chong·mot ja·pangko sandigenchimoba, da·alona kingking maming namgipa report-ko niksona man·kuja ine GSU Eastern Zone, suk ong·gijaniko parakataha.

GSU Eastern Zone-ni parakatani gitade, ua a·sel ong·ani salo chel·chakgipa dolrangko on·genchimode, ua a·sel ong·aoniko chel·chakna man·genchim, indiba maming chel·chakgipa dolko on·na gisiko nangjani a·selsa ua me·chikni janggiko jokatna man·jaha. Unbaksana dosi dakgipa mandeko da·alona kingdingba rim·na man·kujaenga aro uandakgipa mandeni jakgitele roramna man·aniara nokdangni manderangna namen jajrengchakani aro kenchakbeani on·enga.

GSU dilgiparang, MSCPCR-ni Chairman Agatha K Sangma-ko gronge ua a·selni bidingo agan talatahaon, ua mamlani bidingo darangba, Agatha Sangma-na u·iata dongja ine aganchakaha aro ua iani bidingo am·sandianiko dakna gita ku·rachakataha ine GSU, Eastern Zone-ni President Goera R.Sangma parakataha.

GSU, Eastern Zone, ua mamlani bidingo sianggipa me·chikni janggina aro dukko man·enggipa nokdangni manderangna kakket bichalko on·na man·kuja dipet dongtonggija sorkariko didianggen ineba parakataha.