Resubelpara, May 14, 2026: North Garo Hills a·jani dingtang dingtang bajarrango bading chiwalenggipa gipin jatrangni Non-Tribal Trading (TNT) License-rangko ta·raken am·sandichina, dabie ACHIK Organisation, North Garo Hills Zone, Butbar salo GHADC-ni CEM-na chitti sedoataha.

ACHIK Organization, North Garo Hills Zone-ni Co-Chairman Rorok R.Marak-ni janapatani gitade, “A·chikrangni salanti janggi tanganiko namatna gitade, North Garo Hills jolrango donggipa bajar-rango skatang niamgri aro licence gri bading chiwalenggipa gipin jatrang, GHADC-ni TNT license-ko tarina nangchongmota. Uni gimin, TNT licence dongama dongja, District Council-ni gita, name namedake am·sandianiko dakchina mol∙molataha”.

Iako dakchina dabiani miksonganiara, bajar-rango pilak bosturangko palgipa sim·giparang, GHADC-ni maming permission gri bading chiwalenga aro GHADC-ni niam gita TNT licence-rangko tariesa bading chiwalna nanga, ine Marak janapataha.

“Anching ia niamko namen gamchate ra∙na nanga. Niamko ja·rikgenchimode, A·chikrang bading chiwale janggi tanganio maming neng∙nikani gri bading chiwale janggi tangna man·genchim aro A·chikrangna namen dakchakbeani ong·genchim. Niam gita bajar-rango pale sim·e, indigenous manderang nama bewalo janggi tangna gita man·gen” ineba ACHIK Organization-ni dilgipa parakataha.

“Chinga North Garo Hills a·jao pilak ong·enga obostarangko bang·en nikaha. Bajar-rango bading chiwalgipa gipin jatrang pangkamgipa TNT license-rang dongja. Dikdiksa bading chiwalgiparang maming license gri bading chiwalenga” ine ACHIK Organization parakataha..

Unbaksana, salanti gari para salgiparang, North Garo Hills a·jao maming TNT licence gri skatang garirangko salruraenga.
Gari para salgipa gipin jatrang TNT licence dongna nangchongmota. Bang∙a gari salgiparangan TNT license gri para salenga. Uni gimin, niamgri gari para salgiparangni kosako raka ja·kuko de·na nanga, ine ACHIK Organisation, North Garo Hills Zone, dabiangaha.

Indake, niamgri gita bading chiwalani a·sel, North Garo Hills-o songdongenggipa manderangna namen neng·nikaniko ra·baenga aro A·chikrangni mipalko gipin jatrang ra·reke katangenga.

Uni gimin, North Garo Hills a·jani bajar-rango pilak bading chiwalgiparango TNT licence-rang dongna dongja ta·raken am·sandianiko dakchina ACHIK Organization, North Garo Zone, GHADC-ko didiataha.