Gasuapara, April 20, 2026: South Garo Hills a·jani Gasuapara C&RD block-ni ning·o ga·akgipa dambri songrango April 20 tarik pringni 3 ba 4 bajimango mikka balwa ta·rake still on·dapanichi bang·a nok jamrang nosto ong·ako man·aha ine songni manderang u·iataha.

Ia dambri songrangara Rangmai Aruwak songo nok te 40, Tojananggre songo nok te 9 , Durida songo nok te 19 aro Mibonpara songo nok te 120 mikka balwa rake nosto ong·tokaha.

Ua dambri songangara Gasuapara constituency-ni ning·o ong·achim. Duko ga·akgipa nokdangni manderang Gasuapara MLA Sengchim N.Sangma-ni dakchakaniko bi·na call ka·on, phone ra·chakja ine u·iataha.

Unbaksana da·al walni gisepo mikka balwa raktaigenchimode, kate chakna nok jam dongjaha aro da·o dipet darangni dakchakaniko man·kuja, “Uni gimin chingni seoke watatgipa MLA aro MDC chingna ka·sae dakchakaniko on·pachina, chingni dilgiparangko mol·molatpaenga”.