@ghdnews.in@

Tura, Nov. 5, 2025: South West Garo Hills a·jani Mahendraganj-o donggipa Kendrikona Jawahar Navodaya Vidyalaya (JNV) Skulo Hostel Warden dongjani a·sel hostel-o dongenggipa chonchongipa chatrorang, kal·ake roako man·enga ine A·chik State Peoples’ Front (ASPF) Garobadha Regional Unit parakatenba, ua ong·enggipa obostani bidingo ta·rake sandirokaniko dakchina Meghalaya State Commission for Protection of Child Rights (MSCPCR)-na sedoataha.

ASPF Garobadha Regional Unit-ni MSCPCR-na sedoatgipa chittio janapatani gitade, ru·uta somoirangonin ua Kendrikona JNV Skulna Hostel Warden-ko on·kujaengani a·sel dal·batgipa chatrorang, chonchongipa chatrorangko sasti on·e roenga aro hostel-o dongenggipa chonchongipa bi·sarangna kenchakani ong·enga.

“Boys Hostel-o warden dongjani a·sel dal·batgipa chatrorang chonbatgipa chatrorangko ba·ra su·ate, chi ko·ate aro dingtang dingtang kamrangko ka·ate rona man·enga. Mitamkode walni somoirango dokkanrangona watatengani gimin, hostel-o dongenggipa chonchongipa bi·sarangna namen kenchakani ong·enga” ine ASPF Garobadha Regional Unit parakataha.

Indake hostel-o dal·batgipa chatrorangni kal·ake roako man·engani a·sel chonbatgipa chatrorang kene dongna nangenga aro mitam ma·a paarangde, an·tangtangni dedrangko chel·chakna gita hostel-oniko ra·ongkatna nangtokenga, ineba ASPF Garobadha Regional Unit parakataha.

JNV Skul baksana pilak Residential skulrangon Warden-rangko donchina, National Commission for Protection of Child Rights (NCPCR), Education Ministry-na ge·etaniko on·manahachim. Indiba Kendrikona JNV Skulo ua niamko ja·rikjaengani a·sel poraienggipa chatrorangna, mongsongbate bi·sarangna namen kenchakani ong·enga ine ASPF parakataha.

Uandake, Kendrikona JNV Skulo Hostel Warden-ko songjaengani gimin, chonchongipa bi·sarangko kal·ake roenganiko ta·rake sandirokchina ASPF, MSCPCR-ko didiatenba, ua JNV Skulo ta·raken Hostel Warden-ko songchina aro poraienggipa chatrorangni namgnina Child Protection Committee-ko songe, chatrorangna agan-ku·pattianirangko on·china gitaba ASPF Garobadha Regional Unit didiataha.