Tura, August 25, 2026: Adita sak me·chik chadamberang, A·gitok Maharini kosako kragija kattarangchi chonnike ku·sik seltagijarangchi git ring·e, video tarienba Social Media, Instagram aro facebook-o gipatahani gimin, A·gitok Chra Association (ACA), mijal August 24 tariko Tura Pulis Station-o badi ka·e, FIR-ko register ka·angaha.

ACA-ni FIR-o janapatani gitade, sak 5 me·chik chadamberang, “Ia gaora A·gitok Mahari gaora, Bisongde manderangan laura” ine, zixxit_837 Instagram, rasmi_ch_sangma Instagram, sangma_walmitchi Instagram, ama_weangchi Instagram aro nikmeraraksam Facebook-o A·gitok Mahariko chonnike git ring·gipa video-ko watpriprae gipataha. Ia ja·kuko de·na skang, ua ku·atogijagipa gitko post ka·gipa audio-video-ko ra·galpilchina ba den·galpilchina uamangko mol·molahani gimin, mitamrang an·tangtangni Social Media Account-oniko ra·galaha ba den·galaha, indiba mitamrang ra·galna ba den·galna jechakaha. Ia mamlani bidingo ta·rake am·sandianiko dakchina aro niam gita action ra·china bil gnanggipa Pulis Officer-rangko didiataha.

“Chinga chadamberangni ku·sikko katipna ba beng·na man·ja, jerangkon uamang niam gita, an·tangtangni changa sapatangko dake mesokaniko beng·na man·ja. ‘Freedom of Speech aro Expression’ ine aganon, Social Media-o, jinmana ku·sik sel·gijachi sikatang saina, onia ka·na, chonnike rona aro man solman re·atna man·aia ong·ja. Chinga iandake ong·sigipa kattako nike suk ong·ja. Da·o ia obostao ga·akgiparang mitamrangde namen damberangsa ong·a. Mitam ma·a paarangde, uamangni dedrang Social Media-o maiko post ka·enga uko u·ipaja. Chinga na·simangni dedrangko niamchi sinjete ronade sikjachim. Indiba Mahariko chonnike ku·sik seltagijachi chonnike git ring·ako video ka·e, viral ka·ahani gimin A·gitok Mahariko namen kratcha·ataha. Uni gimin je chadamberangan, Social Media-ko niamgri jakkalode, sasti man·gen ine ma·sijakon. Uamang namana jakkalode namachim, indiba namgijana jakkalode, niam gita sastiko man·na krachongmota” ine ACA parakataha.

Uni gimin, je chadamberangan A·gitok Maharini kosako kragija kattarangchi chonnike, git ring·ako video tarie Social Media-o gipatahachim, uamangni kosako niam gita rakgipa sastiko on·china A·gitok Chra Association, Tura Pulis Station-ni Officer incharge-ko didiataha.