Tura, April 14, 2026: Re·anggipa March 9 tariko West Garo Hills a·jao so·sojengjeng ong·angani somoio Chibinang aro Chandigre jolo donggipa, Jisu Kristoni Statue ba mangkrongko nosto ka·e galahani gimin, Bharatiya Janata Party (BJP), FIR ka·na tik ka·aha.

BJP-ni State Vice President aro Tura-ni MDC Bernard N Marak, Chibinang-ona re·ange, so·sojengjeng ong·ani somoio nosto ka·e galgipa biaprangko niangani ja·man, kobor ra·timgiparangna parakataha.

Marak-ni kobor ra·timgiparangna aganani gitade, so·sojengjeng ong·gipa Chibinang aro Chandigre jolo donggipa songrangona re·ange nion, songbad-rango segijagipa aro media-o parakatkugijagipa obostarangko songni manderang, una u·iataha.

“Jolo songdongenggipa manderangni angna aganatani gitade, ua somoio Phulbari-ni gitcham MLA aro MDC Esmatur Mominin, manderangko ding·chaoatani a·selsa ia jolrango so·sojengjeng ong·na a·bachengaha. Manderang ka·a ding·chaoe, Chibinang bajaro donggipa dokkanrangko aro manderangni dongchakenggipa nokrangko wa·al so·e galaha. Uasan ong·aigija mitam manderang, Jisu Kristoni Statue-koba nosto ka·e galaha,” ine Marak parakataha.

Chibinang Bajaro Jisu Kristoni mangkrongko nosto ka·e galaniara Kristianrangni kosako chadrapaniko mesokani ong·aha. Iandakgipa kamrangara niamko pe·asan ong·ja, indiba Indian Constitution-ni ning·o jakgitele olakkina bil man·aniko aro dingtang dingtang jatrangni gisepo tom·tome janggi tanganiko golmal ka·aniba ong·a ine BJP-ni State Vice President parakataha.

Ia a·selni bidingo ua an·tangan FIR ka·gen aro dos dakgipa manderangni kosako rakgipa ja·kurangko de·na gita kamko ka·gen ineba Marak ku·rachakaniko on·angaha.