@ghdnews.in@

Tura, Nov 3, 2025: West Garo Hills Inter Club Taekwondo Championship (Kyorugi) 2-gipa 2025-ko Tura Indoor Sports Hall-o Sonibar salo bon·kame ong·atangaha aro ua tournament-o Selsella-ni B.P. Inspire Skul Tournament-o Medal-rangko bang·bate cheangenba, Best Taekwondo Club Trophy-ko man·angaha.

Indake salgnina ong·atanggipa Tournament-ko nadobaenggipa chadamberangni kal·susaanio changa sapanirangko namdapatna aro tournament-o kal·susae ranta ka·atna, West Garo Hills Taekwondo Association (WGHTA), District Sports Office (DSO) aro Meghalaya Taekwondo Association (MTA) baksa namgrime ong·atangaha.

B.P. Inspire School, Selsella, chu·gimik ge 11 Gold Medal aro ge 11 Silver Medal-rangko man·ange, bak ra·giparangoni sak 38 kal·susagiparang gipin susagiparangko amgopangaha.

Ia tournament-o gipin Club-rangba susaanio nambee dakangaha, jekai Casarina Public Skul Gold Medal ge-10 aro Silveredal ge 2, aro St. John’s Secondary Skul Gold Medal ge 9 aro Silver Medal ge 8-ko man·angaha.
Kal·susaani bon·kamgipa salo bak ra·e, TMB-ni CEO Jude Rangku T Sangma aro WGHTA-ni Officialrang, President Salvious P. Marak aro General Secretary Sanang G. Momin chegiparangna boksisrangko suale on·angaha. Ia kal·susaanirango bak ra·anina aro Takewondo-na gisik nanganina aro changa sapanina, Jude Sangma Garo Hills-ni dingtang dingtang Club-rangoni bak ra·giparangko mittele aganangaha.

Uandake Taekwondo-ara janggi tanganio ranta ka·ani namgipa bewal ong·a ine pilak bak ra·giparangko, sakgipinrangko aro kal·susaani gunrangko rakkiangchina Sangma didianiko on·angaha.

Ia championship-o West Garo Hills-ni ge-12 Club-rangoni sak 183 chadambe kal·susagiparang bak ra·na re·batokaha. Uamang dingtang dingtang gadangrango jekai me·a aro me·chik bi·sarangna Sub Junior, Junior aro Cadet Category-rango kg 18-oni kg 62-ni ning·o ong·giparang Kyorugi-o gisik nange susaangtokaha.