@ghdnews.in@

Tura, Nov. 3, 2025: Garo Hills Autonomous District Council (GHADC)-o kam ka·giparangna October jani gisepon bilsisani dormahako on·gen aro November ja dipet jaantian dormahako on·gnok ine a·dokni Skotong Minister Conrad K.Sangma aro District Level Sub Committee-ni dilgiparang ku·rachakahaoba, da·onan mitam kam ka·giparangde bilsisani dormahako man·kujaenga, ine Tura-ni MDC Bernard N Marak parakataha.

Bernard Marak-ni parakatani gitade, GHADC-o kam ka·giparangoni mitamrang, bilsisani dormahako man·kuja baksana Opposition MDC-rangko galchange, ruling MDC-rangni man·gnirangkosa Executive Committee (EC) bariatskaaha aro da·o ruling MDC-rangni man·gni dormahako gong 75,000-ona bariataha.

“Bang·bata Executive Membor-rangan office-ona giseposan re·baaia, indiba an·tangtangni man·gnirangnade namen gisik nangtoka. Indake ruling MDC-rangni ong·gija dakaniko Sub Committee-na report ka·ani ja·man dontongatahachim, indiba da·o ruling MDC-rang, an·tangtangna man·gnirangko dake ra·taiskaaha ine Marak parakataha.

Seokako man·gipa pilak MDC-rangan apsan dormahako man·pana nangachim. MDC-rangni man·gnirangko ruling MDC-rangnasan dormaharangko on·dapenga, indiba Opposition MDC-rangkode nichanggalenga ine Tura-ni MDC matnangataha.

“GHADC-o kam ka·giparang pilaknan mikkang niteani gri an·tangtangni ku·rachakgimin gita dormaharangko aro pilak man·gnirangko on·china, GHADC-ni Chief Executive Membor (CEM)-na ge·etaniko on·atchina, anga Skotong Minister Conrad Sangma-ko didiatenga. Seoka man·gipa pilak MDC-rangnan apsan man·gnirangko on·na nanga aro ia man·gniara, ANVC aro ANVC-B dolrangni ma·mong aro a·dok sorkari baksa 2014 bilsio songgigrike soi ka·grikani a·selsa ong·ahani gimin, pilak MDC-rangnan apsan man·gnirangko on·na nangchongmota” ine Tura-ni MDC parakataha.