Williamnagar, April 16, 2026: Garo Hills Autonomous District Council (GHADC)-ni ning·o Sixth Schedule a·jao ga·akgipa pilak songrangkon A·chik bimingchi mingchina Niksamso Garo Community Organisation (NGCO) dabiangaha.

NGCO-ni parakatani gitade, Garo Hills-ara ramram biapsan ong·aija, indiba A·chikrangni man·e cha·gipa daka rikani, man·rikani aro Tribal ong·aniko mesokanisa ong·a. Indake ong·genchimoba, Garo Hills-ni bang·a songrangkon, mongsongbate a·kawe jolrango A·chik a·songna kragijagipa bimingrangchisa songni bimingrangko mingtokaha.

Garo Hills-o gipin ku·sikrangchi biming minggipa biaprangko janapatengon, Tura-ni Araimile, Dermile, Baromile, Phulbari, Selsella, Baitbari, Gimaijhora, Miljumla, Batabari, Balachanda, Bajengdoba, Holdibari aro uandake bang·a biaprangkon gipin ku·sikrangchisa biming mingaha, uni gimin, ia biaprang gimikkon A·chik bimingchi mingjitna nanga ine NGCO dabiangaha.

“Ia biaprangara Garo Hills-ni ning·o Sixth Schedule-o ga·akgipa biaprang ong·genchimoba, gipin ku·sikrangchisa biming mingahani gimin, A·chik a·songni biaprangna kraja” ine NGCO Garo Hills-o gipin ku·sikrangchi biming minggipa pilak biaprangkon sandie, A·chik Ku·chi mingsrechina GHADC-ko didiataha.