GHD News, Oct 16, 2025: South Garo Hills a·jani Gasuapara Community and Rural Development (C&RD) Block-ni ning·o donggipa Nokma-Sanirang aro songni nokni manderang October 15 tarik Butbar salo Panchayat Advancement Index (PAI)-ni gimin jinma Gasuapara kal·chakramo tom·e chanchirimaha.

Uamangni tom·e chanchirimanio PAI-ko ra·chakna man·chongmotjawa ine jegalattokaha. Unbaksana PAI-ko biming dingtang done kamrangko ka·na miksonganiko knasoe, Nokmarang iani bidingoba maming jajaani grian biming mingjite kam ka·na miksonggenchimoba, ra·chakna man·jawa, District Council-ni bil gita ong·ja dipet a·dokni direct Nokma A·king Goreo bilko jakkalna am·aniko on·jawa ine raken jegalangtokaha.

Mikkangchiba Nokmarang aro songni nokni manderang apsan ku·monge nangani kri tom·e chanchirimaniko dakanggen ineba parakataha.

Panchayati Raj bilrangko jakkale, PAI aro gipin kamrangko a·dokni jak gita direct on·ana bate, a·dok sorkari Autonomous District Council (ADC)-ni bilko jakkalna nanga aro ADC-ni gamchataniko A·chik ong·e, dingtang dingtang niamrangchi sinjetaniko warachakgipa dilgiparangsa ong·na nanga ine Nokmarang parakataha.