Tura, July 18, 2026: Garo Hills-ni Nokma-Sani Union (NSU), Bristibar salo rang·gitik tom·bimonganiko Tura-ni District Auditorium-o ong·ate, Garo Hills-ni Nokma-Sanirang, Fifteenth Finance Commission-ni ning·o Rural Local Bodies (RLB) ba songko nokko chalaienggipa dolrangna sorkarini chamatenggipa tangka paisarangko jakkalsretani gimin chanchirimangaha.

Ua tom·anio Nokma-Sanirang songko nokko chalaienggipa Rural Local Body-rangna sorkarini chamatenggipa tangka paisarangko contractor-rangni gita koros ka·engani gimin, raken jegalangaha aro ua tangka paisarangko Nokma-Sanirang gitasa koros ka·na on·china dabiangaha.Iandake songni nokni namgnirangna sorkarini chamatenggipa tangka paisarangko contractor-rangchi kamrangko ka·ataniara, songko nokko namroro silroroatna miksonge, Meghalaya a·dokni Autonomous District Council (ADC)-rangko mangrakbatatna, India sorkari, Meghalaya sorkari aro Garo-ni dingtang dingtang dolrangni gisepo songgigrikaniko pe·ani ong·a ine tom·anio Nokma Sani Union matnangataha.

Meghalaya a·dokara, Indian Constitution-ni Article 243M-ni ning·o Panchayati Raj System-oni watchanggalako man·gipa ong·ani gimin, Fifteenth Finance Commission-ni ning·o songko nokko chalaienggipa bimangrangna Autonomous District Council gitasa tangka paisarangko sorkari watatenga ine janapatenba, Fifteenth Finance Commission-ni Tied aro Untied Grant-rangara, songo noko namroro silroroanina chamatgipa tangka paisarangsa ong·a aro ua tangka paisarangko Nokma-Sanirangsa jakkalna bilko man·na nanga ine Nokma Sani Union dabiangaha.

Songni nokni namgnina chamatenggipa tangka paisarangko Rural Local Body (RLB) ba Village Council (VC) ba Gram Panchayat (GP) ba Village Employment Council (VEC) aro Program Executive Implementation Committee (PEIC)-rangna on·ani pal GHADC-ni Executive Committee-sa ua tangka paisarangko contractor-rangni jak gita jakkalskaenga ineba Nokma Sani Union matnangataha.

Rural Local Body (RLB)-na chamatgipa pilak Tied aro Untied Grant (TU)-rangko RLB, VC, GP, VEC aro PEIC-rangnasa on·na nanga ine dabiangenba, “Iani bidingo Nokma Sani Union, GHADC-ni Chief Executive Member (CEM)-na sedoatmanaha aro iani bidingo GHADC, maming ja·kurangko de·chipjagenchimode, jatko dilgiparangna on·gimin bilrangko chel·chakna gita Kachario badi ka·na draatako man·gen,” ine Nokma Sani Union, mikrakataniko on·ataha.

Gipin biaprangoni re·bae kam ka·giparang aro bading chiwalgiparangko Garo Hills-ni Nokma A·kingrango nokchakna gita A·king Nokmarangna on·gimin bilko mangrakbatatna gita ua tom·anio Nokma Sani Union tik ka·angaha.Nokma Sani Union-ni tom·bimonganio, Tura-ni MDC Bernard N Marak, GHADC-ni gitcham Deputy CEM Nikman Ch Marak, ma·mong aro a·dok sorkari baksa songgigrikanio soi ka·gipa ANVC dolni gitcham Commander-in-Chief Jerome Momin, GSMC-ni Acting Chairman Balkarin Marak aro gipinrang dongpae bak ra·angaha.