Tura, May 6, 2026: Re·anggipa March jao, Garo Hills Autonomous District Council (GHADC) election-o gipin jatrangni susaaniko jegalmiting somoio, so·sojengjeng ong·ani bidingo Garo Hills-ni dingtang dingtang NGO dilgiparangko rim·ahani gimin, Tura-ni MDC aro Bharatiya Janata Party (BJP)-ni State Vice President Bernard N Marak, MDA sorkariko matnangataha.

Indake so·sojengjeng ong·aniko ra·bagipa Phulbari-ni gitcham MLA Esmatur Mominin aro GHADC-ni gitcham MDC Sofior Rahman-ko rim·ani bewal aro NGO dilgiparangni kosako case ka·ani bidingo Tura-ni MDC Meghalaya sorkariko sing·doataha.

GHADC election-o gipin jatrangni susaaniko jegalgipa dingtang dingtang NGO-ni dilgiparangko rim·anina Garo Hills-o songdongenggipa manderang suk ong·tokjaenga aro kenchakanirang batroroenga, ineba Tura-ni MDC parakataha.

Marak-ni parakatani gitade, rim·a man·gipa NGO-ni dilgiparangko adita salrangna skangsan, Garo Hills Peace Forum, chong·motan mondolini dilgiparang grongeaha.

Ia a·selni bidingo adita sak chadamberangko rim·anina da·o name nipiltaianirangko dakengaha ine parakatenba, ia chadamberangko rim·anina A·chik a·songni manderang suk ong·tokjaenga ine Marak parakataha.

GHADC-ko chalaienggipa EC baksa da·o bakrimenggipa sakgni MDC-rang chong·motan, Cherak W Momin aro Rinaldo K Sangma-koba Garo Hills-o so·sojengjeng ong·mitting somoio chakpaaniko on·ahani gimin, rim·na miksonganirang donggenchimode, ia sakgni MDC-ni kosako sorkari ja·kurangko de·genma ineba Marak sing·doataha.