@ghdnews.in@

Tura, Feb 5, 2026: Re·anggipa January jani 9 tariko, Rajabala Pulis Station-ni ning·o donggipa Goalgaon songo, Dilseng M Sangma-ko so·ote galanio jak donggipa mande saksako pulisrang rim·dapna man·aha aro ua a·selni bidingo rim·ako man·gipa manderang da·o gimik sak 9 gapaha.

Pulisrangni u·iatani gitade, bilsi 26 ong·gipa Anisul Sheikh-ko Monggolbar walo, Bhaitbari songoniko rim·aha.

“Dilseng M Sangma-ko so·otanina, Rajabala pulisrang, bilsi 26 ong·gipa Anisul Sheikh-ko rim·dapna man·aha. Rim·ako man·gipa mande, batanggimin adita salrangna pulisrangoni kate dongengachim, indiba pulisrang, uko Mongolbar walo, Bhaitbari songoniko rim·na man·aha,” ine West Garo Hills a·jani Superintendent of Pulis (SP) Abraham T Sangma parakataha.

Una skangba pulisrang, ua a·selni bidingo sak 8 manderangko rim·aha aro rim·a man·gipa manderangni bimingranga, bilsi 30 ong·gipa Anarul Islam, bilsi 47 ong·gipa Rafiqul Islam, bilsi 40 ong·gipa Atowar Hussain, bilsi 30 ong·gipa Ariful Islam, bilsi 21 ong·gipa Ashadur Sheikh, bilsi 22 ong·gipa Mozidur Hussain, bilsi 33 ong·gipa Mofidur Hussain aro bilsi 22 ong·gipa Mozahidur Rahman ong·achim.

Re·anggipa January-ni 9 tariko Wadagokgre jolo niamgri chalaienggipa ro·ong quarry-ko chipatna re·ange, re·bapilengmiting somoio ACHIK dolni member-rangko Goalgaon songo, rorirang champengsoenba, ro·ong, atte, rua, jompol aro uandakgipa silchidarerangchi chadrapsoahani gimin, ACHIK member-rangoni saksa Dilseng M Sangma, rasong gribee so·otako man·aha.

Ia a·selni bidingo am·sandina gita Dadenggre-ni Sub-Divisional Pulis Officer (SDPO) RA Sangma-ni dilanichi Special Investigation Team (SIT)-ko songaha aro ua a·selo jak donggipa manderangni bidingo saoba koborrangko man·genchimode, 7005680094 nomber-ona call ka·e u·iatchina pulisrang mol·moliataha.