Chokpot, May 01, 2026:South Garo Hills a·jani Chokpot Civil Sub Division-ni a·bri jolrango Mobile Network-na aro Bijolina namen neng·nikanirangko man·engani gimin, South Garo Hills-ni gitcham ACHIK Organization-ni dilgipa Mansrang Ch.Marak, South Garo Hills, a·jani Deputy Commissioner (DC)-na chitti sedoataha.

Mansrang Marak, Chokpot Sub-Division-ni a·bri jolrango songdongenggipa manderangni palo, ua jolni neng·nikanirangko janapatena, nangchongmotgipa kamrangko chu·sokatna man·gija dongengani gimin, DC-na chitti sedoataha.

Marak-ni DC-na seatgipa chittio janapatani gitade,
​da·ororo somoio, ia a·brini songrango Airtel aro Jio mobile Network-rang namsrangjaenga aro MePDCL department-ni kamrang chu·sokna man·jaengani a·sel namen neng·nikanirangko man·enga. Iandake kamrangko ka·anirango namen neng·nikaniko ra·baenga. Unbaksana manderangni salanti janggi tanganiko champengatani ong·enga aro manderangna neng·nikanirangko on·enga:

​Ia jolo poraienggipa chatro-chatrirang bijoli dongjani a·sel, sal napani ja·mano andal mindik poraina man·gija neng·nikaniko man·enga. Iasan ong·aigija Internet-ni chasong ong·ani gimin, online poraigiparang aro gipin digital educational resource-rang neng·nikaniko man·enga, ineba Marak janapataha.

​Da·ororo digital-ni somoio, network-na neng·nikanirangko man·ode, manderang communicate ka·na, emergency service-rangko man·na aro sorkarini online kamrangko chu·sokatna namen neng·beani ong·a. ​Songni manderangni salanti janggi tanganio neng·nikaniko ra·baa aro uamang sorkarini dakchakanirangko man·na gita neng·enga.
​Uni gimin, “Chinga nang·ni office-ko ia kamna gisiko on·china mol·molenga. Nang·ni dakdilanichi, mobile network on·gipa company-rangko aro bijoli department-ko Chokpot jolni kamrangko namdapatna nangni gisiko nange nirokataniko nangenga” ine Marak seachi mol·molataha.

“​Chinga nang·ni dilanio ka·dongchakani gnang aro ia neng·nikanirangko namatna ja·ku de·gen aro jolni manderang nang·ni dakchakaniko man·sona ka·dongenga” ine Marak parakataha.