Tura, July 2, 2026: A·chik State Peoples’ Front (ASPF), HQ Tura, Rajabala, Ballachanda, Haldibari aro Selsella ramako name tarigija sorkarini chamatgipa tangka paisarangko jakkalsrete manderangko cha·bokani gimin, contractor-rang aro PWD Official-rangko, Section 173 (3), Bharatiya Nagarik Suraksha Sanhita (BNSS)-o pangchake, West Garo Hills-ni Superintendent of Pulis (SP)-na badi ka·doangaha.

West Garo Hills a·jao donggipa Rajabala-Balachanda-oni Haldibari-Selsella gita Garobadha-ona re·gipa ramako taridapanio PWD Department-ni Engineer-rang ramani kosakgilgil repidape tarigimin rama garirang re·ruraa baksana mikka waani ja·manon nosto ong·piltaiaha ine ASPF parakataha.

Ua ramako taridaptaianiko contractor-rang aro PWD Department-ni Official-rang kakket ong·e, manderangni namgnina chamatgipa tangka paisarangko ong·gija jakkalsrete manderangko togie cha·ani ong·a. Ramako taridapani adita salrangni ja·manon rama nosto ong·taipilani a·sel songdongenggipa manderang, salantio nangana re·ruragiparang, sagipa manderang aro chatro chatrirang namen neng·nikaniko man·enga ine ASPF janapataha.

Uni gimin songdongenggipa manderangni neng·nikaniko niate Section 318, 316, 61 aro 270, BNS-ni ning·o mokordoma ka·aniko segatchina, A·chik State Peoples’ Front (ASPF)-ni Chief Organizing Secretary Raksim Marak, Superintendent of Pulis (SP)-ko mol·molataha.