Shillong, July 2, 2026: Meghalaya a·dokni Skotong Minister Conrad K Sangma-ni dilachi June 30 tariko Cabinet tom·aniko ong·ate, adita ming mongsonggipa niamrangko ra·chakangaha.

Skanggipa a·dokni Cabinet Minister-rang songadam nokadamrango namroro silroroatani aro manderangna janggi tangani cholrangko on·na, MGNREGS-ni palo gital biming mingjitgipa, Viksit Bharat Guarantee for Rozgar and Ajeevika Mission Gramin (VB-GRAM G)-ko Meghalaya a·dokoba ra·gatna gita ra·chakaha. Ia VB-GRAM G-ni ning·o sorkari, kam ka·e cha·ani salrangko, songni manderangna sal 100-oni sal 125-ona ra·dodapataha aro ia Scheme-ni ning·o songni manderang, songni ramarangko, Anganwadi Centre-rangko, skul nokrangko rikana aro samtangtango ong·telaigiparangko ripinge rakkianio bak ra·e, an·tangtangna janggi tangani cholrangko dake ra·na man·gnok. Ia gital VB-GRAM G program-ni ning·o Meghalaya a·dok, jaskuna gong kror 1,100 tangkarangko man·soaha.

Ua tom·anio a·dokni Cabinet, 2007 bilsini December 31 tarikna skang, sanction ka·gipa sorkarini kamrango rakkigipa sak 38 Adhoc Employee-rangko Regularize ka·na gitaba ra·chakangaha.

Indake aapsan tom·anio a·dokni Cabinet, taridapgipa Meghalaya Public Service Commission (MPSC) (Limitation of Functions) Regulations, 1972 aro Regulation 3 (f)-ko den·galanikoba ra·chakangaha.
Unbaksana, Meghalaya Civil Service Rules 1975-ni ning·o, pay scale baksa Special Secretary (Level 22)-ni mingbri kamrangko ong·katatna gitaba tom·anio Cabinet ra·chakangaha.

Una agreba, Meghalaya Money Lenders and Accredited Loan Providers Bill, 2026, Meghalaya sorkarini Law Department-o Legal Remembrancer & Secretary-ko songani aro Meghalaya Banning of Unregulated Deposit Schemes (BUDS) Rules, 2026-koba tom·anio Cabinet ra·chakangaha.