Tura, July 31, 2026: West Garo Hills a·jani Rongram C&RD Block-ni ning·o donggipa Asanang aro Rengsangre jolo bijoli ching·a tik ong·jaengani a·sel, jolni manderang, dingtang dingtang office-rango kam ka·giparang, online gita poraienggipa chatro chatrirang aro online gita kam ka·giparang namen neng·nikaniko man·enga ine jolni manderang u·iataha.

Maini a·sel, Asanang aro Rengsangre jolo bijoli ching·a tik ong·jaenga, salo aro waloba chang channa ampilgija, ching·a kimita dakenga ine jolni manderang sing·doataha.

Mikka waoba sal rakoba maimancha dake salo chang 6 chang 7 batpile bijoli sienga. Load Shedding ka·ode somoi done ka·na nanga, load shedding dongjaode bijoliko tik ong·e watna nanga. Mongsongbate da·ororo chadamberangni poraianio ba dingtang dingtang nanga kamrangko ka·na gita bijoliko nanga, bijoli gri maming kamkon ka·na man·ja.

Iani bidingo MePDCL department aganchakna nanga aro chu·onga gita kam ka·giparangko rakkie, bijoliko tik ong·e watna nanga. Jaanti bijoli bill-rangko gamenga, indiba bijoliko nanga gita jakkalna man·jaenga.

Unbaksana voltage-ba chu·ongja, maini gimin voltage komienga, ukoba check ka·e namatna nanga ine jolni manderang janapataha.

Iasan ong·aigija, Rengsangre songo silni bijoli krongrang ge·saba dongja. Department-ni manderang bijoli krongrangko songe on·ja, songni manderang an·tangtangsa bolni bijoli krongrangko songe aro wire-rangko bree jakkalenga. Indiba bill-kode jaantian gamenga. Lineman-rang Rengsangre song ning·chi nape line nosto ong·arangko tarie on·ja, songni manderangsa tarienga. Lineman-rang soroko dongipa transformer sambaona re·bae, gisepo nirokenga, indiba bijoli ching·ade salsaba aro walsaba tik ong·srangja ine songni manderang parakataha.

Department-ni authority-rang Rengsangre songona re·bae, nirokena nanga aro silni bijoli krongrangko songe on·na nanga. Batanggipa 2021 bilsio Tura-ni DC Ram Singh an·tangan Rengsangre songona re·bae kengniko nikangaha aro namen kenchakani ong·engani gimin, “Anga ta·raken MePDCL-ni Engineer-na lekka seate silni bijoli krongrangko songe on·china didiatgen” ine ku·chakahachim. Indiba da·alona kingkingba, department silni bijoli krongrangko songe on·kuja ineba songni manderang parakataha.