@ghdnews.in@

Tura, Nov 5, 2025: West Garo Hills a·jani Rongram Block-ni ning·o ga·akgipa aro Jengjal Sub-Division-ni ning·o donggipa, jean Dadenggre Constituency-ni ning·o ga·akachim, Anogre-oni Silsekgre, Gindopara, Renchagre-ona re·gipa mongsonggipa ramako bilsi 50 batangpiloba, maming taridpani gri galchipe donengani a·sel jolo songdonggipa manderang neng·skime janggi tangna nangtokenga, ine songni manderang parakataha.

Jolo songdonggipa manderangni u·iatani gitade, ian Garo Hills-o ba Meghalaya a·doko namjabatsranggipa rama ong·genkon. Ia ramako 1970 bilsimangon, Public Works Department (PWD) jako ra·e, rama cho·aha aro ua sal somoirangonin da·alonaba maming taridapa dongkuja, ine janapatenba, kosako janapgimin songni manderang ia ramakon salanti an·tangtangni dingtang dingtang nanga kamrangna re·ruraenga. Ia songrango songdonggipa manderang komibeoba sak hajal gittam mangni gita donga.

Ia ramko salantian songni manderang, bading chiwale cha·giparang, mongsongbate skul re·giparang rama namjani a·sel re·a doanio namen neng·nikaniko man·enga. Mongsongbate sagipa ding·gipa manderangko hospital-rangona ra·ange sanna banako dakanio neng·nikanirangko man·enga, maina ambulance garirang re·na gita man·ja, ine songni manderang parakataha.

Ia ramani bakroa km 15 mangsan ong·aiachim aro ia ramaan Jangrapara, Damal A·sim, Dadenggre aro Phulbari-ona najokeachim. Indake ong·engon, maini gimin ia ramako tarigija galchipe donenga ine songni manderango sing·on, ia ramako tarie on·na gita darangba, joltangni MDC, MLA-rang gisiko nangja aro a·dokni Skotong Minister-na sediate dabia dongjani a·sel indakgipa obosta ong·enga ineba songni manderang parakataha.