@ghdnews.i @

Shillong, Jan 15, 2026: Re·baenggipa Garo Hills Autonomous District Council (GHADC) election-o Congress party ge 29 seat-rangon susaanggen ine parakataha.

Congress dolo susana gita sak 67 candidate-rang party tikitna dorgastorangko on·aha ine Congress dilgipa, Manuel Badwar parakataha.

GHADC election-o susana dorgasto galgipa candidate-rangko seokengon, uamang u·i-ma·sigipa manderangko, ku·rang on·rakgipa aro kragipa, chong·motan Sixth Schedule-ni gimin name ma·sigipako sandienga ine Badwar parakataha.

Congress dolo candidate-rangko seokanio district council-ko an·tangni namgnina mangmang chanchiaigija mandeko basegija manderangna kam ka·na gisiko nanggipa mandeko basena miksongenga ineba ua parakangaha.

District Council-ko Sixth Schedule, a·jao songdongkamgipa manderangsa chalaina nanga ine Badwar aganangkuaha.

GHADC election-na sal somoirangko tik ka·ani ja·mansa candidate-rangni bimingrangko parakatgen ine u·iataha.

Batanggipa 2021 bilsini GHADC election-o Congress ge 12 seat-rangko cheaha, indiba gipin MDC-rang baksa apsan chapdimna man·jae, majority-ko man·jaha. Uni gisepon NPP ge 11 seat-rangkosan cheaha, indiba gipin MDC-rang baksa chapdimna man·ahani gimin, uamang majority-ko man·aha aro EC-ko rikaha, ine Badwar parakataha.

Indiba ia chango Congress dol nambate kamrangko ka·na tarisoenga aro bang·bata seat-rangko chetaina ka·dongenga ineba Congress dilgipa parakataha.