Tura, Oct 20, 2024:Garo Hills Autonomous District Council (GHADC) Phulbari Forest Range Office-ni staff-rang, Ranger-ni dilachi Sukrobar salo Balujora songo niamgri chalaienggipa ro·ong quarry-ko champengataha.

Songni manderang ua quarry-ni gimin kobor on·atani ja·man, Ranger an·tangni ka·rimska staff-rang baksa re·ange sandianiko dakenba ua ro·ong quarry-o niamgri jakkalenggipa gopretanirangko ra·sekaha aro uan jolni manderangna namen kenbeani ong·achim.

Ua ro·ong quarry-ko Assam-ni mandesa niamgri chalaiengachim aro ua ro·ong quarry-ko chalaienggipa mandeo authority-ni on·gipa maming lekkarang dongjachim aro ua songni manderango sing·chenggija skatang A·chik a·songo ro·ong bikotengachim.

Ua jolrango ba sepangjolo bang·en niamgri ro·ong quarry-rangko chalaiengani gimin am·sandianiko dakenba, ro·ong quarry-oniko machinery, pipe aro gipin dingtang dingtang bosturangko ra·sekaha. Indake, Phulbari Range Officer mikkangchiba niamgri kam ka·giparangni kosako raken ja·ku de·anggen ine parakataha.