Shillong, Nov 4, 2026: A·dokni gitcham Education Minister Ampareen Lyngdoh aro gipin sak 2 kamoni neng·takgimin official-rang, jemangan education scam-o case dongachim, Meghalaya High Court-ni Chief Justice IP Mukerji, uni retire ong·na salsa skang mangmang, uamangni case ba mamlako bon·aha aro jakgitel ong·aha ine order-ko tarie on·angahani gimin, CBI ua mamlani bidingo namedake am·sandianiko dakangkuna gita jako ra·e kamko ka·ani ja·man, Supreme Court (SC) uamangna notice-ko ba u·iataniko on·ataha.

Ia mamlani bidingo re·anggipa jao hearing-ko ong·ataha aro Apex Court, Ampareen Lyngdoh aro gipin sakgni official-rangna, CBI-ni case filed ka·a ja·man, special leave petition (criminal) notice-ko ba u·iataniko on·ataha.

Indake, special leave petition -ni gita, ‘High Court-ara maina Trial Court-oniko record-rangko sandija ba am·ja, FIR-ko den·galna ba trial-ko dakna skang, maina CBI-chi am·sandianiko a·bachengatna, apsan High Court-onin ge·etaniko on·a’, ine CBI sing·doangaha.

Una agreba, High Court-ara maina trial ka·ani kamrangko ta·rakatna aro sakki on·aniko komiatna, gita Lower Court-o sing·chengja, jedakode trial ka·anio nangchakeani dongjawachim, ine CBI aganaha.