Tura, Oct 8, 2026:: Re·anggipa adita jarangna skang Garo Hills-o so·sojengjeng ong·ani a·sel, Garo Hills Autonomous District Council (GHADC) election-ko ra·doatenba, GHADC-ni term-ko October 18 tarikona ra·doatani somoi da·o bon·na siengahani gimin, GHADC-ni term-ko ra·dodapgija, election-ko joljol ta·raken ong·atchina Garo Hills-o dingtang dingtang NGO-rangni Nangrimgimin A·chik Dol (NAD), a·dok sorkario dabiangaha.

Adita salrangna skang, NAD-ni member-rang, Tura-ni C&C Hotel Conference Room-o tom·aniko ong·atenba, GHADC election-ko ta·raken ong·atchina dabiangaha.

“Ia tom·anio NAD-ni member-rang pilakan, GHADC-ni term-ko ra·dodapgija election-ko ong·atchina nangnike jak songe ra·chakangtokaha. GHADC election-ko ra·dodaptaigenchimode, chinga rakbee jingjengatna gita tik ka·aha,” ine NAD-ni dilgiparang parakataha.

Una agreba ua tom·anio NAD-ni member-rang, GHADC-o online gita gital a·a patta tarianiko dontongchina raken dabiangtokaha.Garo Hills-o gipin biaprangoni napsrukbae songdong a·chagipa gipin jatrang batrorobaengani gimin, chanchirimengon, gipin biaprangoni niamgri napsrukbae songdongenggipa rorirangko a·rikgalna gita a·dok sorkari, Mass Eviction Drive-ko ong·atna nanga ineba tom·anio NAD dabiangaha.

Unbaksana, Sixth Schedule a·jani ning·o Municipality-ko donaniara niamni a·palo ong·a ine tom·anio NAD-ni member-rang, Tura Municipal Board (TMB)-ko ra·galchina sorkario dabiangaha aro iani bidingo rakgipa ja·kurangko de·e dabina tik ka·eba donangaha.

GHADC election-o susagipa candidate-rang, Scheduled Tribe (ST) certificate donggipa ong·na nanga aro GHADC-na dingtang electoral roll-ko dabiani chu·sokgipa ong·na man·ahani gimin, ian A·chik jatni cheani ong·aha ine re·baenggipa October 16 tariko, A·chik jat gimikko okamchimonge, Tura Bajar-ko re·wilwile jinma dama doke chrokna gitaba tom·anio NAD-ni member-rang tik ka·angaha.