Tikrikilla, Sep 12, 2026: West Garo Hills a·jani Tikrikilla aro Raksamgre constituency-o dingtang dingtang project-rangko a·dok Skotong Minister Conrad K.Sangma Sukrobar salo a·bachengate on·anga baksana pangchakanirangko songe on·angaha.

Ua project-rangko a·bachengate on·angani salo a·dokni Skotong Minister baksana Tourism Minister Timothy D Shira, Deputy Speaker Limison D Sangma, Tikrikilla-ni MLA Jimmy D Sangma, Garo Hills Autonomous District Council (GHADC)-ni Chief Executive Member (CEM) Dhormonath Ch Sangma aro dingtang dingtang official-rangba dongpaaha.

Indake ua salni bako a·dokni Skotong Minister, Raksamgre Sub-Division-ni ning·o donggipa Jangrapara songo, RCC dollongna pangchakaniko songe on·angan baksana Tikrikilla-ni Nagargaon-o gital Tourism Guest House-ko kulie on·angaha aro Raksamgre-o gital Tourism Guest House-ko riknaba pangchakaniko songe on·angjolaha. Una agreba Tikrikilla-o gital kuligipa ‘Megha Agro Gold’ Agro Processing Unit-koba oprake on·angaha.

Ua project-rangko a·bachengate on·anio a·dokni Skotong Minister, manderangna aganprakangengon, songadamrango aro a·dokni diltubatsranggipa biaprango namroro silroroaniko ra·bana sorkari raken kamrangko ka·enga ine aganangaha.

Songadamrango rama jal·lang namosa namroro silroroaniko ra·bana man·a, rama jal·langrangko tarie on·anichi Baghmara-oni Rongara-ona konta 3 re·na nanggipa ramako da·ode batbeoba minute 45-san nangaiaha aro Rongara-oni Ranikor-ona skango konta 3 nanggipa ramako da·ode konta 1 mangsan nangaiaha ine Skotong Minister aganaha.

Batanggimin bilsi 8-ni gisepo MDA sorkari, a·doko km 3,500 mangni gital ramarangko tariaha, batanggimin bilsi 20-ni gisepo iandake rama tarianiko a·doko changsaba nika dongkuja ine Skotong Minister aganaha.

Gong kror 3500 tangkachi rikenggipa Dhubri-Phulbari dollongan, salgro salaram jolo ro·batsranggipa dollongko da·o matchotna am·engaha aro ua dollongko kuliahaode, salgro salaram a·dokrangna namgni ong·gnok ineba Sangma aganaha.
Dalu-oni Baghmara, Baghmara-oni Ranikor, Ranikor-oni Shella, Ratacherra aro Bangladesh simaona tarina sienggipa ramani giminba Skotong Minister janapangjolaha.

Rama jal·langrangsan ong·aigija a·dok sorkari, dingtang dingtang nokrangko rike on·na gita kamko ka·enga. Batanggimin bilsibrini gisepo, a·doko dam 56 block-rangko rikna aro skul, block office aro health centre-rangko taridapna gong kror 200-na baten tangka paisarangko chamataha ine Sangma aganangaha.

Uarangan agreba, Garo Hills Autonomous District Council (GHADC)-o Patta Management System (PMS) Portal aro Service Conduct Rules Book-ko a·bachengate on·na man·ahani gimin, Skotong Minister, GHADC-ni CEM Dhormonath Ch Sangma-ni dilenggipa Executive Committee aro pilak MDC-rangkoba mittele aganangaha.

GHADC-na dingtang electoral roll-ko tarina gita ja·kurangko de·chakatahani gimin, GHADC-ko mittelpilangengon, ia niamko pass ka·anichi Garo Hills-o songdongenggipa manderangni ru·uta bilsirangna dabianiko chu·sokate on·na man·aha ine Sangma kusi ong·aniko parakangaha.

Uandake, GHADC-o dingtang electoral roll-ko tarina ja·ku de·chakatahani gimin gipin jatrangko gisik sajachina didiatangenba, ian Tribal jatrangko aro Tribal-rangni daka rikanirangko chel·chakna nangtelgipa niam ong·a ine Skotong Minister talatangaha.