Tura, Sep 16, 2026: Meghalaya Board of School Education (MBOSE)-ni bilsianti ong·atenggipa Secondary School Leaving Certificate (SSLC) 2026-2027 porikkako re·baenggipa December 4 tarikoni December 16 tarikona ong·atgen ine parakataha.

SSLC porikkani bidingo u·iatengon, ia bilsiode December 4 tariko a·bachengate, December 16 tariko matchotatgen aro porikkako tik ka·gimin salrango, pring 10 bajioni attam 1 bajiona ong·atgen ine MBOSE-ni Accreditation Director aro Examination-ni Controller TR Laloo parakataha.

MBOSE official-ni u·iatani gitade, SSLC porikkani skanggipa sal, chong·motan December-ni 4 tariko English subject-ko ra·gen aro uni ja·man, December-ni 7 tariko Science subject-ko ra·gen.
December-ni 9 tariko, Mother Indian Language (MIL) subject aro Additional English-ko ra·angskagen. MIL-o Garo, Khasi, Hindi, Bengali, Assamese, Nepali, Urdu aro Mizo ku·sikrangko sena gita man·gen, ineba parakataha.

December-ni 11 tariko, Health & Physical Education, Computer Science aro Vocational Subject-rang aro December-ni 14 tariko Social Science subject-ko ra·skagen.

Indake, IDecember-ni 16 tariko, Mathematics aro Special Mathematics subject-ko ra·e, SSLC porikkako matchotatgen. Vocational subject-na Board listed Beauty & Wellness, Tourism, Health Care, Electronics, Agriculture, ITES, Apparels, Plumbing, Food Processing, Telecom, Banking aro Automobile Repair-ko ra·anggen aro ia subject-ko Computer Science ba Health & Physical Education-ni pal sena man·skagen.

Indake, a·dok ba ma·mong sorkarioni maiba nangchongmota kamrangna u·iatanirang donggenchimode aro porikkani sal somoirang baksa apsan ong·genchimode, tarikrangko dingtangatna nangani cholrang dongaia ine MBOSE-ni official, u·iataha.