Tura, Sep 6, 2026: Tura-o donggipa Maternity and Child Hospital (MCH)-o sanna bananiko on·enggipa Doctor-rang, Nurse-rang aro kam ka·giparangni dongchakenggipa quarter-rango ru·uta bilsirangna chi jokjaengani a·sel kam ka·giparang namen neng·nikaniko man·enga aro ringani chirangko breesa jakkalna nangenga ine u·iataha.

Iani bidingo batanggipa 2025 bilsini May 1 tarikon, District Maternity and Child Hospital (MCH)-ni Medical Superintendent, quarter-rango donggiparang china neng·nikaniko man·engani gimin, gital pipe line-rangko teke on·china, Health Engineering Wing (DHS)-ni Executive Engineer-na sedoataha.

Indake Medical Superintendent-ni lekka sedoatani gimin, Health Engineering Wing (DHS)-ni Executive Engineer, 2025 bilsini June 9 tariko Tura PHE Division-ni SDO-na lekka seatahachim. Indiba da·alona kingkingan Maternity and Child Hospital-o sanna bananiko on·enggipa doctor-rang, nurse-rang aro kam ka·giparangni quarter-rango gital chi pipe line-rangko teke on·kuja, ine Maternity and Child Hospital-ni quarter-rango donggiparang parakataha.

Uandake ru·uta sal somoirangna, Maternity and Child Hospital-o sagipa manderangna dangdike on·enggipa doctor-rang, nurse-rang aro kam ka·giparangni dongchakenggipa quarter-rango china neng·nikaniko man·engahani gimin, Maternity and Child Hospital-ni quarter-o donggipa doctor-rang, nurse-rang aro kam ka·giparang, September 3 tariko Gambegre-ni MLA aro a·dokni Health Advisor Mhetab Chandee A.Sangma-ko gronge, lekka sedoangaha.