Tura, July 16, 2026: West Garo Hills a·jani ning·o donggipa Kherapara, Nalnapara aro Surunanggre songrango bijoli krongrang be·na am·engani gimin, SAI Computer Ltd-ni Manager-na songni manderang changni chang badi ka·oba, tarie on·chipgija, donengani gimin manderangna namen kenchakani ong·enga ine u·iataha.

SAI Computer Ltd. be·na am·enggipa bijoli krongrangko ra·gale gital bijoli krongrangko tarigija donchipengani gimin, songni manderang dingtang bolko songchape, buduchi kae jakalaenga ine u·iatenba, ua bijoli krongrang be·na nangode, bilongen kenani ong·enga, mongsongbate bi·sarangna aro Matchu materangna kenchakani ong·enga. Unbaksana ijoli wire-rango, bolrang be·dapani gimin, lineman-rangna u·iatoba, den·e galrongja, songni manderangsa den·e galenga.

SAI Computer Ltd-ni manderang bijoli line-rangko nirok simsaka dongja aro chu·onga gita lineman-rang dongjani gimin, kam ka·giparangko chu·onga gita rakkichina jolni manderang didiataha.

Salanti walanti bijoli sikamani a·sel, poraienggipa bi·sarang namen neng·nikaniko man·engani gimin, jadokni porikkao bijoliko name ching·atchina Dalu Block-ni ning·o songdongipa, manderang, SAI Computer Ltd. office-ona re·ange mol·molahachim. Indiba salo channa ampilgija bijoli sienga. Nosto ong·gipa bijoli line-rangko salgimik bijoli dongjani somoio tarina man·achim. Indiba tarigija, bijolini bosturang man·chakjaenga ine pa·sike dongaia, una gital bosturangko teke ba tarie on·china songni manderang mol·molahaoba knachakja ine songni manderang parakataha.

Robibar salo Gilja ka·ani somoio mangba bijoli ching·a tik ong·jani a·sel Gilja name ka·na aro olakkina man·ja. Mikka balwa dongjaoba, pangnan bijoli sisimaia, indiba bijoli bill-de on·tisaba komija, batesa bill-rang bang·bate sokenga. Pangnan walni 7 ba 8 bajirango changbri ba changbonga sisimani gimin, maini a·sel bijoli sienga ine songni manderang sing·doataha.

Mitam lineman-rang bijolini breaker ingipako ge·sa tekna nangenga ine aganani gimin, uko teke on·china, SAI Computer Ltd-ni mandeangko aganoaoba, teke on·chipja. Uni gimin manderangni nangnika gita bijoliko on·na man·jaode, SAI Computer Ltd. jako ra·na nangja, MePDCL department-na pakwate on·na nanga ine songni manderang sorkariko dabiataha.