Tura, July 12, 2026: West Garo Hills a·jani ning·o ga·akgipa Kerapara-oni Rimrangpara-ona Asugre gita Diganggre-ona tarigipa PMGSY rama namjani a·sel Rimrangpara jolo songdonggipa manderang neng·nikaniko man·enga ine parakatenba, Amongpara GHADC constituency-o susaenggipa TMC candidate Sairil D. Marak PWD (Roads) Barengapara Division-ni Executive Engineer-na sedoataha.

Rimrangpara jolo songdonggipa manderang dingtang dingtang nanga kamrangna Tura aro Dalu re·ruraanio, mongsongbate sagipa manderangko hospital-rangchi ra·angna aro skul bi·sarang, bading chiwalgiparang, game ge·e cha·giparang salantian neng·nikaniko man·enga. Uni gimin, ua ramako ta·rake tarichina Marak Engineer-ko didiataha.

Ua ramako tarienggipa M/S JC Infra Corporation Ltd-ni kamrang agre ka·sinenga aro kamrang namsrangja ine jegalatenba, Amongpara-ona dakanggipa ramao bike salgiparang bang·en a·selrang ong·enga, una agreba Nachi A·du-oni dakanggipa ramaoba apsan daken manderang a·sel ong·enga, ine Marak parakataha.

Ua ramarangko re·ruraanio maming naljokani dongja aro tarienggipa ramarang namsrangja aro nirok simsakgipa dongjani gimin, ua ramako ta·rake nirokatenba name tarichina Sairil Marak chittio janapataha.

Rimrangpara-oni Josipara-ona dakanggipa PMGSY ramarangko tarienggipa M/S MP Agarwala Pvt. Ltd-ni kamrangba namjaenga aro namen ka·sinenga aro uko nirok simsaka dongjani a·sel ramarang namsrangjae, songdonggipa manderangna neng·nikaniko on·enga. Uni gimin PWD, Barengapara Division-ni Engineer-ko niroke kamrangko ka·atchina aro manderangni namgnina ta·rake tarichina Marak didiataha.