Tura, July 16, 2026: NPP-ni chalaienggipa Meghalaya Democratic Alliance (MDA) sorkario BJP bakrimgpa dol ong·oba, Tripartite Agreement-o ku·rachakgimin kamrangko chu·sokate on·china aro Garo Hills Autonomous District Council (GHADC)-o kam ka·enggiparangni bangki dormaharangko ta·rake on·china, BJP-ni State Vice President aro Tura-ni MDC Bernard N.Marak, paraken a·dok sorkariko didiaha.

Tripartite Agreement-ni Paragraph 3.1-ko chu·sokatna sorkari ja·manchakenga ine janapatenba, je niamon GHADC-o kam ka·giparangna jani skanggipa tarikon dormaharangko on·gen ine kam ka·giparangni jingjengatmiting somoio ku·rachakahachim, ine Marak sorkariko matnangaha.

Sorkarini ku·rachakgimin donggenchimoba, July 10 tarikonan, GHADC-o kam ka·giparangna dohmaharangko on·kuja. Unbaksana sorkarini ku·rachakgimin ja 30-ni arrear-rangko da·onaba on·kuja ine BJP dilgipa parakataha.

Kam ka·giparangni dormaharangko somoi gita on·jani a·sel, kam ka·giparang tangka paisana namen neng·nikaniko chagrongna nangenga, uni a·selan loan-rangko gamanio, dingtang dingtang bill-rangko gamanio aro sabisirangko man·anio sanna banna, bi·sarangko poraiatanio korosrangko gamna neng·nikanirangko man·enga ineba Marak janapataha.

Indake, dormaharangko somoi gita man·jani a·selan, bang·a kam ka·giparang uamangni loan-rangko somoi gita chotna man·jae, loan-ko tik ong·e chotja ine matnganiko man·enga, ineba ua parakataha.

GHADC-o kam ka·giparang kamni kri uamangni dormaharangko somoi gita man·na nanga, uni gimin a·dok sorkari kam ka·giparangni man·na nangenggipa dormaharangko ru·utate donchagija somoi gita on·na nanga aro uamangni man·gni arrear-rangkoba on·china Marak sorkariko didiataha.

Indake, Tripartite Agreement-ko ja·rikgija ru·utate dongenchimode, neng·nikani ong·gen ineba Tura-ni MDC parakataha.