Tura, Oct 15, 2026: Special Intensive Revision (SIR) ba Electoral Roll-rangko taripilanio, niamko ja·rikja ine matnangenba, Chief Election Commissioner (CEC) Gyanesh Kumar-ko kam watchina dabie Bristibar salo, District Congress Committee (DCC) Congress dol, Tura-o jinma re·jomaniko ong·atangaha.

Ia jinma re·jomanio, Garo Hills-ni dingtang dingtang a·jani Congress dolna kam ka·giparang bak ra·angtokaha.

Indake re·jomaniko, Meghalaya Pradesh Congress Committee (MPCC) aro West Garo Hills District Congress Committee (DCC) ong·atangaha. Ia jinma re·jomaniko Congress dolni dilgipa Zenith Sangma dilangaha.

Indake jinma re·jomaniko Tura Congress Bhawan-oni a·bachengate, DC Office aro Tura Bajar gita Congress member-rang, CEC Gyanesh Kumar-ko kam watchina dabiangtokaha.

Ia jingjengatanio Indiani Chief Election Commission-ni kamrangara, a·songni niam bidikko pe·ani ong·enga ine CEC Gyanesh Kumar-ko ra·galchina dabiangaha.

Uko ra·galjagenchimoba, ua an·tangan kamko watna nanga ineba Sangma dabiangaha.

Chief Election Commissioner-ni ong·gija dakgipa kamrangni gimin, manderangna u·iatna jinma tom·e re·jomaniko ong·ataha.

Iandakgipa kamrangko a·songni manderang jrip nie dongaiode, mikkangchi a·songna namjabatgipa obostarang sokbagen ine Sangma mikrakataniko on·angaha.

Indiani Election Commission-ni Special Intensive Revision (SIR)-ko ka·engani gimin, Congress jegalenga ong·ja, maina batanggimin somoirangode maming jegalani grian ia kamko name chu·sokatna man·aha, indiba da·alo Election Commission-ni kam ka·ani bewalrang namjaengani a·sel, a·songo songdongkamgipa manderang dilgipako seokanio bak ra·gipa manderangni bimingrangkon den·galengaha ine Sangma parakataha.

Chief Election Commissioner Gyanesh Kumar, kamtangko watna jechakgenchimode, Congress jingjengatanirangko dontonggijan dakangkuaigen ineba Sangma parakataha.

Gaynesh Kumar-ni iandakgipa kamara BJP sorkarina mikpakma nie kam ka·ani ong·enga aro a·songni democracy-ko nosto ka·ani ong·enga aro a·songo kangal cha·asianiko ra·baaniba ong·enga. Uni gimin, Congress dol iandakgipa CEC-ni kamko ra·chakna man·jawa aro nie dongjawa. Jedakeba an·chingni democracy-ko naljokatna ba chel·chakna raken kamko ka·na nangchongmotenga. Uni giminsa chinga da·alo Gaynesh Kumar-ko ra·galchina dabie, jinma re·jomaniko dakenga.

Ia jegalaniko an·chingni Garo Hills-o ba Meghalaya a·dokosan ong·aigija, India a·songni dingtang dingtang a·dokrangon CEC-ni namgijagipa kamko jegale, jingjengataniko dakenga ineba Sangma parakataha.