Baghmara, Oct 15, 2026: Dudnhoi-ni Baghmara-ona dakbagipa National Highway (NH)-217 sorokko ta·rake tarichina dabie aro Right of Way (RoW) sorokni apbala metre 24-oniko metre 18-ona apchonate tarina am·enganiko jegale, Garo Hills Independent Candidate Movement Forum (GHICMF)-ni dilgiparang, South Garo Hills-ni NGO-rang baksa bakrime, October 14 tarik Butbar salo Public Rally ba jinma re·jomaniko dakangaha.

la Rally-ko ong·atanio South Garo Hills-ni dingtang dingtang NGO-rang jekai GSU, FKJGP, AHAM, ADE, AYWO, ADIL, GSMC, NGCO aro ASONG baksa bakrime ong·atangaha.

GHICMF-ni parakatani gitade, Ministry of Road Transport and Highways (MoRTH), National Highways Authority of India (NHAI), NH-217 sorokko tarina tangka paisarangko watatahaoba, South Garo Hills a·janini sorokko da·alonaba tarie on·kujaenga, batesa sorokko apchonatna am·skaengani gimin, South Garo Hills a·jao songdonggipa manderang suk ong·gijaniko mesokna jinma re·jomaniko ong·atangaha.

lndake, jinma re·jome jegalangaanio GHICMF-ni sakgni candidate-rang 2-Wagesikgre GHADC constituency candidate Noresh M. Sangma aro 3-Silkigre GHADC constituency-ni candidate Chusrang R. Sangma dongpae NGO-rang aro songni nokni manderang baksa bakrime ku·rang on·angpaaha, ine GHICMF-ni ku·wattimgipa Clinton R.Marak u·iataha.

South Garo Hills-o songdongenggipa manderangni mongsonggipa nangnikaniara, NH-217 sorokko ta·rake tarichina aro tangka paisa on·atgimin ba sanction order ka·gimin gitan mamingba komiata gri NH-217 sorokko a·dok sorkari tarichina dabiangaha.

“Chingni dabia gitan NH-217-na on·gimin, metre 24 Right of Waw-kon maming apchonata gri tarie on·china ku·rang chinga on·atenga” ineba Marak u·iataha.

Indake niamni a·palo South Garo Hills-na chong·motan Baghmara-na on·atgipa NH-217 sorokko sawamancha bakandikatana chanchidilaha ine GHICMF aro NGO-rang sing·doataha.

Uni gisepon, mikkangchi South Garo Hills-o songdonggipa manderangni dabianiko knachakja ong·ode aro mikkrakatani kattarangko dal·e ra·jaode, mikangchi ku·cholsan bakrime uandakgipa manderangni kosako rakgipa sastiko on·china ma·mong sorkarina badi ka·doanggen ineba GHICMF-ni ku·wattimgipa parakataha.