Tura, July 9, 2026:: Tura-ni Nokmarang, Indian Constitution-ni ning·o Sixth Schedule-na on·gipa Constitutional aro Traditional Rights ba Bilrangko pe·ani bidingo, West Garo Hills a·jani ba Tura-ni Deputy Commissioner (DC)-na chitti sedoaha.

Nokmarangni A·kingo donggipa Nokma Office-oniko, No Objection Certificate (NOC)-ko ra·chenggija, Assam-ni aro gipin biapni manderang skatang re·bae kam ka·giparangna GHADC-ni Labour Department, Labour License-ko aro Taxation Department-ni TNT ba Hawkers Licenses-ko on·ani gimin, Nokmarang, ua niamko bidingo DC-na seachi u·iataha.

Gipin biaprangoni re·bae Nokmni A·kingrango skatang nape kam ka·giparangna license-rangko on·na skang Nokmarang baksa maming agangrikchenggija gipin biaponi re·bae kam ka·gipa manderangna licence on·aniko Nokmarang raken jegalataha.

Sixth Scheduled a·jao ga·akgipa a·arang Nokmarangni A·king ong·a aro ua biaprango kamrangko ka·na skang Nokmarangna u·iatna nangchongmota. Nokmarango sing·chenggija ba u·aitgija gipin biaprangoni re·bagipa manderangna license on·niara Constitution-ni niamko pe·ani ong·a.

Ian Traditional Administration ba Nokmarangni bilko bilgriatani aro Sixth Schedule-ni niamrangko pe·ani ong·a ine Nokmarang DC-na badi ka·doangaha. Unbaksana, Sixth Schedule-ni ning·o donggipa Garo Hills Autonomous District Council-ni bilrangko jakkalanio Court-o bang·a mamlarang (case)-rang nakataha ineba janapataha.

Traditional Head ba Nokmarangni bilko Administrative Authority-rang, ra·ekna man·ja aro Nokmarangna u·iatgija, License-rangko on·niara Constitution-ni on·gimin niam gita ong·chongmotja ine Nokmarang jegalataha.

Uandake Nokma-rangni NOC gri on·gipa pilak Labour Licence aro Hawker License-rangko den·galchina Nokmarang DC-ko dabiaha.

Nokma Office-oni maming ra·chakani gri Sixth Scheduled-ni a·jao kam ka·na gita license ba permit-rangko on·na man·jawa. Jedakode gipin biaprangoni Nokma A·kingo kam ka·na rimbagenchimoba, 60% percent kam ka·giparangde joltango dongkamgipa manderang ong·na nanggen. Jemangan Nokmani NOC gri gipin a·dokrangoniko kam ka·na rimbaenggipa contractor-rang gong 10,000-ko dai gamna nanggen, ine parakataha.

Unbaksana NOC gri Nokmani A·kingrangona niamgri napdrae kam ka·genchimode, gong 10,000-ko dai gamatgen ineba Nokmarang u·iataha.

Uni gimin, gipin biaprangoni kam ka·na re·bagipa manderang Nokmani NOC-ko ra·na aro biming segatna gita www.nokmasani.com ona re·ange NOC aro bimingrangko segatna man·gen, ine u·iataha.