Resubelpara, July 9, 2026: Gari Students’ Union (GSU) Northern Zone aro gipin Zonal-rang baksa bakrime, Butbar salo North Garo Hills a·jao bajar anti cha·enggipa gipin jatrang TNT licence gri bading chiwalgiparangko che·em che·em sandianiko dakchina dabie,GHADC-ni CEM aro Deputy CEM-ko gronge chitti sedoangaha.

North Garo Hills-ni dingtang dingtang bajar antirangona gipin jatrang TNT licence gri skatang re·bae bosturangko palenga aro bading chiwalaniko dakenga, ine janapatenba, uamangko GHADC-ni dongimin niamo pangchake am·sandianiko dakchina GSU Northern Zone, CEM aro Deputy CEM-ko mol·molangaha.

Gipin jatrangni niamgri Garo Hills-ona re·bae bading chiwalani a·sel, songtangni noktangni manderang bajar antirango bosturangko palna sim·e janggi tangna aro bading chiwalaniko dakpana cholko man·jaenga, ine janapatenba, TNT licence gri bading chiwalgipa gipin jatrangko ta·raken sandichina didiangaha.

GSU Northern Zone-ni dabianiko ba mol·molaniko knachake, GHADC-ni CEM aro Deputy CEM, ta·raken kamrangko ka·atgen, ine ku·rachakatahanina GSU Northern kusi ong·bee, GHADC-ni dilgiparangna mittelpilskaaniko on·ataha.