Resubelpara, Jun 18, 2026: North Garo Hills a·jani Bajengdoba aro Mendi jolrango niamgri Saw Mill ba Bol Ratani Karkanarangko chalaienga ine NGO-rangni badi ka·ani ja·man, June 18 tarik Bristibar salo, Forest Department-ni Official-rang aro pulisrang aro NGO-rang Bajengdoba aro Mendi jolni dingtang dingtang biaprango niamgri chalaienggipa Saw Mill-rangko chadrape rim·aha ine koborko man·soaha.

Darugre, Dainadubi aro Kharkutta-ni Range Forest Officer in-charge Chisaka Ch Marak-ni u·iatani gitade, Bajengdoba aro Mendi jolrango niamgri Saw Mill-rangko chalaienga ine June 11 tariko, dingtang dingtang NGO-rang jekai Matgrik Do·mesal, APA, ADE, FKJGP, AYWO aro ASPF dolrangni badi ka·anirangko man·soe, niamgri chalaienggipa Saw Mill-rangko chadrapeaha.

Bristibar salo Dainadubi Range, Kharkutta Range, Darugre Range aro Simsanggre Range-ni Forest Official-rang apsan nangrime, NGO-rangni u·iatgipa biaprangona re·ange, dambri Saw Mill-rangko chadrape rim·na man·aha. Ua saw mill-rangko chadrapanio, Forest Department-ni official-rang aro staff-rang, karkanarango jakkalenggipa bol ratani dingtang dingtang bosturang ba machine-rangko ra·sekna man·aha.

Indake niamgri Saw Mill-rangko chalaiengani a·sel Garo Hills-ni dingtang dingtang biaprango donggipa bang·a bolrang wa·arang gimaroroangengani a·sel, environment nosto ong·enga aro namjabatroroenga.

“Chinga man·a dipet, iandake niamgri chalaienggipa Saw Mill-rangko bon·atna gita raken kamrangko ka·enga aro mikkangchiba ka·angkugen” ine Marak parakataha.

June 18 tariko Forest Official-rang baksa Pulis officer-rang aro dingtang dingtang NGO-rang, North Garo Hills-o niamgri chalaienggipa bol ratani karkana ba Saw mill-rangko rim·na man·ahani gimin, Forest Official-rang, Pulis Officer-rang aro bakrimpagipa pilak NGO-rangko, ASPF HQ, Tura-ni Chief Organising Secretary Raksim Marak dingtangmancha mittelpilskaaniko on·ataha.