Tura, June 17, 2026:: North Eastern Hill University (NEHU), Tura Compus-o kam ka·enggiparangni dabianirangko chu·sokatchina dabie, Tura Campus Staff Welfare Association (TCSWA), Monggolbar saloni kam dontongate ba ‘Pen Down-Tool Down’ ka·e jingjengataniko a·bachengataha.

Ia jingjengatani bidingo TCSWA-ni ku·wattimgipa T.K. Marak-ni parakatani gitade, uamangni dabienggiparangara Department of Personal Training (DoPT) Order-ko a·bachengatchina, Kam ka·giparang ba Employee-rangko gadangni kri nigrikgija mitamko Semi Skilled-ona ra·doenba, dikdiksani ja·mano uamangko Unskilled-ona ra·onpilanira authority-rangni kal·ake roani ong·a aro uamangni gisiko namen neng·nikataniko on·enga. Uni gimin ua kamrangko nipiltaichina aro mitamrang EPF-ko man·aha, indiba mitamrang man·kuja iani bidingo batanggimin salrango chubata gadangni Authority-rangna u·iatahachim.

Indiba da·alonan mamingkon dakkujaenga. “Chinga apsan kamrangkon ka·genchimoba, man·anirangko apsan man·jaenga, dormaha bang·gijako man·a baksana mitamrang EPF-koba man·jaengani a·sel neng·nikaniko man·enga. Uni gimin apsan kamna apsan dormahako on·china chinga dabienga” ine parakataha.

NEHU-o kam ka·e sianggiparang, kamoni neng·takgiminrang Pension man·jagenchimoba, Gratuity mangmangkoba man·jani gimin, uamang dabigenchimoba, authority-rang mamingkoba dakdapa dongja, ine janapatenba kamoni neng·taka ja·mano aro siangani ja·mano dongrikenggipa nokdangni manderang neng·nikanirangko man·enga, unbaksana sana-bananirango NEHU-ni maming dakchakanirangko man·ja ineba T.K Marak suk ong·gijaniko parakataha.

Unbaksana somoi gita dormaharangko man·jaenga ine janapatenba, “Chingni bang·pagija man·enggipa dormaharangko somoi gita man·jaengani a·sel saa ding·anirango aro bi·sarangna skul fee-rangko gamanirango neng·nikanirangko man·enga. Iani bidingoba, chinga chubata gadangona sedoatahachim, indiba da·alonan maming dingtanganiko man·kuja” ine Marak aganaha.

Uni gisepon chingni dabianirangko knachakkuja dipetna kamrangko dontonge jingjengataniko dakangkugen ine TCSWA-ni ku·wattimgipa parakataha.

Uandake DoPT Order-ko a·bachengatchina, arbitrary promotion aro demotion-ko nipiltaichina, Gratuity-ko ta·raken on·china aro employee-rangna somai gita dormahako aro apsan kamna apsan dormahako on·china, TCSWA dabiangaha.