Shillong, May 01, 2026:Meghalaya a·dokni Bengaluru, Hebbal minggipa biapo nok para ra·e dongenggipa bilsi 34 ong·gipa me·chik saksani manggisiko uni nokoniko man·aha. Ua me·chik Manipur-ni bilsi 28 ong·gipa me·asa saksa baksa namen meliachim aro apsan noko dongachim. Pulisrangni chanchichipani gitade, ua me·chik an·tangni dongchakenggipa nokni ceiling-o kae siaha.

Uamang sakgnian bilsi gittam mangna namen ripeng meliachim aro apsan nokon dongachim. Jensalo ua me·chik office-o kam ka·aha, uni ripeng me·asaba security guard ba nitimgipani kamko man·aha.

Koborni gitade, uamang sakgni pangnan jegrikrongachim. Indiba ua me·chik maidake siaha aro mai ong·aha, iani bidingo chong·mot a·selko ma·sina da·o sandianiko dakenga ine koborko man·aha.