Tura, April 27, 2026: West Garo Hills a·jani Dadenggre Sub Division-ni ning·o donggipa, Ajigre songni bilsi 11 ong·gipa me·chik bi·sa saksa rabies sabisiko man·aha ine chanchipanio Tura-ni Hospital ge·gnio pallang dongjae ra·chakjani gimin nokona ra·angpilmitting somoio ramaon siaha ine matnangahani gimin, iani chong·mot a·selko ning·tue sandichina Dadenggre-ni MLA, Rupa M. Marak-ni Deputy Commissioner-ko ge·etani jaman, Magisterial Inquiry-ko dakchina DC ge·etaniko on·aha.

Marak-ni u·iatani gitade, ia bi·sako Tura-ni hospital ge·gnion ra·chakjani rabies sabisiko man·e siaha ine matnanganiko namedake am·sandichina ge·etaniko on·ataha.

Koborni gitade, Dadenggre-ni Ajigre songoni bilsi 11 ong·gipa, Netera Sangma rabies sabisiko man·aha ine chanchichipanio nambate sananiko on·na gita Dadenggre CHC-oniko, Tura Civil Hospital-ona watatahachim.

Indiba ua bi·sako Tura Civil Hospital-ona ra·angon, pallang dongja ine ra·chakjahani gimin, me·chik bi·sani ma·drang, Holy Cross Hospital-ona ra·angskaahachim, indiba, Holy Cross Hospital-oba sanna gita ra·chakjaha. Indake Tura-ni Hospital ge·gnion ua me·chik bi·sako ra·chakna jechakahani gimin, ua bi·sako nokona ambulance-o ra·angpilengmiting somoio nokchi sokangna skangan ramao siaha ine u·iataha.

Indake ong·engon, ua bi·sa rabies sabisiko man·ani a·sel siaha ine chanchichipani a·sel chong·motko ma·sina gita Magisterial Inquiry-ko dakchina gita Marak ge·etaniko on·ataha ine West Garo Hills a·jani Deputy Commissioner Robibar salo parakataha.