Tura, April 16, 2026: Re·anggipa March 9 tariko Garo Hills-o so·sojengjeng ong·ani somoio, West Garo Hills a·jani a·kawe jolo donggipa Chibinang Bajar-o Miriam-ni Statue ba Mangkrongko nosto ka·e galanina sak 6 manderangko pulisrang rim·aha ine West Garo Hills a·jani pulisrang u·iataha.

Pulisrangni u·iatani gitade, Chibinang Bajaro donggipa Miriam-ni Mangkrongko rusie galanina Tura-ni MDC Bernard N Marak-ni FIR ka·na skangan pulisrang sandina a·bachengaha aro ua a·sel ong·anio pangchake sak 6 manderangko rim·aha.

Uandake adita salrangna skang, BJP-ni State Vice President aro Tura-ni MDC Bernard N Marak, Chibinang-ona re·ange nieani ja·man, Garo Hills-o so·sojengjeng ong·ani somoio nosto ong·gipa biaprangko niangani ja·man, ua Miriam-ni Mangkrongko nosto ka·e galanina, FIR ka·gen ine parakatahachim.

“Ua jolo songdongenggipa manderangni angnatani gitade, ua somoio Phulbari-ni gitcham MLA Esmatur Mominin, manderangko ding·chaoatani a·selsa ua jolrango so·sojengjeng ong·na a·bachengaha. Manderang ka·a ding·chaoe, Chibinang bajar-o donggipa dokkanrang, GSU office aro manderangni nokrangko wa·al so·e galaha. Uasan ong·aigija mitam manderang, Jisu Kristoni Statue-koba rusie galaha” ine Tura-ni MDC, Chibinang jolona re·angani ja·man parakataha.

Chibinang Bajar-o Jisu Kristoni Mangkrongko nosto ka·e galaniara Kristianrangni kosako chadrapaniko mesokani ong·a. Iandakgipa kamrangara niamko pe·asan ong·aija, indiba Indian Constitution-ni ning·o jakgitele olakkina bil on·aniko aro dingtang dingtang jatrangni gisepo tom·tome janggi tanganiko kajia ka·ani ong·a ine Marak parakataha.

Indake, re·anggipa March jao so·sojengjeng ong·ani bidingo pulisrang da·o dipet dolgnionikon sak 40-na baten manderangko rim·aha ine West Garo Hills a·jani Pulisrang parakataha.

“Re·anggipa March 9 aro 11 tarikni gisepo salgittamna Garo Hills-o so·sojengjeng ong·anina pulisrang, dolgnini manderangkon rim·aha” ine Pulisrang parakataha.