Williamnagar,April 16, 2026: Re·anggipa April 8 tariko Songsak Pulis Station-ni ning·o ga·akgipa Dagal Nachikol songo, be·enni gita cholgri ong·gipa mande saksako, doke siatanio jak donggipa sak 15 manderangko East Garo Hills a·jani pulisrang rim·na man·aha ine parakataha.

Pulisrangni u·iatani gitade, re·anggipa April 8 tariko, Dagal Nachikol songo be·enni gita cholgrigipa mande saksa Talseng T Sangma-ni nokona ma·sina man·gijagipa dolsa manderang, atterang aro batdilrangko ra·e re·angenba, uko kragija chadrapeaha aro uni jikgipa aro pagipa budepakoba ka·saninggija doke donbaaha.

Doka man·gipa Talseng Sangma, bilongbee saknaako man·ahani gimin, nokni manderang aro ma·drangrang uko ta·raken sanna gita Songsak PHC-ona ra·angahachim. Indioba, ua bilongbee saknaako man·ahani gimin uko Williamnagar Civil Hospital-ona ra·angchina doctor-rang aganaha, indake uko Williamnagar Civil Hospital-ona ra·angmiting somoion ua janggi galaiaha.

Iani bidingo sianggipa mandeni nokdang aro ma·drangrang, April 9 tariko Williamnagar Pulis Station-o FIR ka·aha. Uamangni FIR-o Dagal Nachikol songni sak 13 aro Nangapa songoni sak 3 gimik sak 16 dos dakgipa manderangko biming mingaha.

FIR-o biming minggipa sak 16 manderangoni da·o sak 15 manderangkode rim·aha, indiba saksade kate dongkuenga ine East Garo Hills a·jani pulisrangrang parakataha.