Dalu, April 16, 2026: West Garo Hills a·jani Barengapara Sub-Division-ni ning·o donggipa jio tower-rangko name nirokjaengani gimin, jolo songdonggipa manderang namen neng·nikaniko man·enga ine Sairill D Marak parakataha.

Sairil Marak-ni parakatani gitade, Karonggre, Doldengagre, Kerapara , Rongbokgre, Chollongpara songorango donggipa jio tower-rangko name nirok simsakjani a·sel jolo songdonggipa manderang namen neng·nikaniko chagrongenga.

Ia tower-rango bijoli dongosan, tower ‘on’ ong·aia, indiba bijoli ‘off’ ong·ode tower-ba off ong·aia ine u·iataha.

Iandakgipa obostarangko chagrongna nangengani a·sel Job Card-na kam ka·enggipa manderangba, online photo ka·na man·jaenga aro uasan ong·aigija, mongsongbate poraienggipa bi·sarang namen neng·nikaniko man·enga aro bajar antirango korosrang ka·genchimoba, online gita tangka gamna man·jaenga ine Marak parakataha.

Uasan ong·aigija office-o aro Hospital-rango nangchongmotgipa kobor-rangko ra·grikna gita namen neng·nikbeani ong·enga. Ia tower-rangko maini gimin, nirok simsakgija galchipe donenga ine Marak sing·doataha.

Indake nirok simsakgija galchipe donggenchimode, nie dongjawa ra·gipa ja·kuko de·anggen ineba parakataha.