GHD News, Oct 8, 2025: Central Bureau of Investigation (CBI)-ni official-rang tangka gus ra·ani mamlao East Garo Hills a·jani Assistant Branch Post Master, Williamnagar-ni Sub Division Inspector aro Rongjeng Sub-Post Office-ni Postman ong·enggipa sakgittam manderangko rim·aha.

Rim·a man·gipa sakgittam manderangara East Garo Hills-ni Assistant Branch Post Master Adarsh Kumar, Williamnagar-ni Sub Division Inspector N.Hemanta Meitai aro Rongjeng Sub Post Office-ni Postman Arjun Reang ong·achim.

CBI official-ni u·iatani gitade, ua sakgittam manderang, Postal Department-ni ja 10-na dormaha on·gija donenggipa jagnini dormaharangko on·china dabie, Rongjeng Sub Post Office-ni Block Post Master, Gram Dak Sevak-ni badi ka·ani ja·man, October 4 tariko ua sakgittam manderangni kosako mokordomako segataha.

Uandake dolgnini gisepo tik ka·grikani ja·man, matnanga man·gipa sakgittam manderang, gong hajal 30 tangkarangko gus ra·na tik ka·enba, badi ka·gipa mandena dormaha on·ani ja·man, uamangna tangka gamchina dabiaha.

Ua mandeni badi ka·a ja·man, CBI official-rang, Williamnagar-ni Assistant Branch Post Master-ni gong hajal 30 tangkarangko ra·engmiting somoio rim·na man·aha. Uni ja·man, CBI official-rang, sakgipin Sub Division Inspector-ko Shillong-oniko aro Rongjeng-ni Postman-ko Tripura-ni Dhalai a·jao donggipa Ambassa-oniko rim·na man·aha

Uni ja·mano CBI official-rang, matnanga man·gipa sakgni manderangni kam ka·enggipa aro uamangni dongchakenggipa biaprangoniko am·sandie nion, ong·gija kamrangna jakkalengipa lekkarangko man·aha aro Postman-ni dongchakgipa Upanagar songoniko gong lak 2 hajal 30 tangkarangkoba man·aha.

Rim·a man·gipa sakgittam manderangko CBI Official-rang, katchario mikkang pa·atna sienga ine u·iataha.